माओवादी लडाकुतय् पाय्छि ल्याः वयेधुंकाः
देय्या थीथी शिविरय् च्वनाच्वंपिं माओवादी लडाकुतय् पाय्छि ल्याः अनमिनं सरकारयात लःल्हाःगु दु। खास यानाः अनमिनपाखें गोप्य याना तयेमाःगु धयातःगु थ्व ल्याः सरकारया ल्हातय् थ्यनेवं सार्वजनिक जूगु दु। अनमिनं बिउगु ल्याः कथं आः थीथी शिविरय् माओवादी लडाकुया ल्याः १९,५४१ म्ह दु। थ्व ल्याः माओवादीं न्हापा दावी यानाच्वंगु ल्याः स्वयां खास हे फरक मखु। राष्ट्र संघं संसारया मेमेगु थासय् नं थथे हे शान्ति प्रक्रियाय् लडाकुतय् ल्याः तयेगु ज्या यायेधुंकूगु कारणं नेपाःया सवालय् जक राष्ट्र संघं बिउगु थ्व ल्याःयात माने याये मखु धायेगु पाय्छि जुइ मखु। बरु सरकारं थ्व ल्याः वये न्ह्यः तक माओवादीं लडाकुया ल्याः अप्वः क्यनाः सरकारया ध्यबा नयाच्वन, शिविरय् लडाकु धइपिं हे मदये धुंकल, आपालं बिसिउँ वनेधुंकल, आदि आदि धकाः द्वपं बियाच्वंगु खः। आः अनमिनया तथ्यांक पिहां वयेधुंकाः अबलय् सरकारं बियाच्वंगु फुक्कं द्वपंया अथें हे खण्डन जूगु दु ।
आः अनमिनपाखें लडाकुया ल्याः उपलब्ध यायेधुंकाः सेना समायोजनया ल्यायात याकनं क्वचायेकेगुपाखे राज्य न्ह्यायेमाःगु दु। समायोजनया ई ताःहाकः यात धाःसा लडाकुत कायल जुयाः शिविर त्वःताः बिसिउँ वनी व माओवादी अथें हे निःशस्त्र जुइ धइगु बिचाः यदि राज्यं यानाच्वंगु खःसा व देशय् हानं मेगु द्वन्द्वयात पियाच्वंगु सरह जुइ। लडाकुत कायल जुयाः उमिसं मेगु विद्रोह यात धाःसा उकिं माओवादी जक मखु राज्यय् हे मेगु अशान्ति पिकायेफु। थुकियात ध्यानय् तयाः आः समायोजनपाखे हे धिसिलाक्क पलाः न्ह्याकेमाःगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
