पुलांगु भजन आकाश भैरव भजन

शीला साय्मि

येँ देय्या दकलय् पुलांगु भजन खलः कथं चर्चित भजन खलः खः 'श्री आकाश भैरब भजन खलः'। परापूर्वकालंनिसें न्ह्याना वयाच्वंगु थ्व भजन थौं नं उलि हे सुमधुर तालं वंघःया आजुद्यःछेँय् न्ह्याना हे च्वंगु दनि। न्हापा न्हापा सुथ व बहनी न्ह्याइगु भजन थौंकन्हय् धाःसा बहनी जक न्ह्यानाच्वंगु खंकेफु। ईया हिउपालं थथे याःगु जुइफु।
न्हापा मनोरञ्जनया साधन आः थें आपाः मदु तर मनूतय् द्यः प्रति आस्था आपाः दु। उकिं बुराबुरि नापं ल्याय्म्ह व मस्त नं न्हापा भजनय् हे मग्न जुयाच्वनी। थौंकन्हय्या परिस्थिति पायेधुंकल। मनूतय् धर्मप्रति आस्था म्हो जुजुं वनाच्वंगु दु। मनूतय्गु ब्यस्तता व आर्थिक कारणं न्हापाथें भजन याइपिं मनूत खंके हे थाकु ।

समाज व भजनय् वयाच्वंगु विकृति चीकेगु व पुलांगु संस्कृति संरक्षण यायेगु, मनूतय्गु नुगलय् न्हापाथें हे धर्मप्रति चेतना ब्वलंकेगु आज्जु ज्वनाः श्री आकाश भैरब भजन खलः आः तकं न्ह्यानाच्वंगु दु। भाजु शिव श्रेष्ठया अध्यक्षताय् नकतिनि न्हूधाः जुल। थुगु न्हूगु समितिया संरक्षक कथं पुलांम्ह वडा अध्यक्ष विकास श्रेष्ठ व भाजु ओमकार श्रेष्ठ च्वनादीगु दु ।

नित्यरुपय् न्ह्याइगु थुगु भजनय् विशेष यानाः राशलिला, श्रृंगार रसया भजनत हालेगु याइ। बुद्ध भजन, ज्ञानमाला, दहिलिला आदि नं हाःसां भजनया शुरु धाःसा पञ्चभजन हालाः हे याइ ।

थन हालीगु भजन थीथी भाय्या दु। मैथिली, हिन्दी, नेवाः व संस्कृत भाय्या भजन तकं हालेगु याः। नायः भाजु श्रेष्ठया कथं "न्हापा न्हापा नेवाः भासं भजन च्वये व हाले मसःबलय् मैथिली भाषं जक हालेगु यानाच्वंगु खः। आः नेवाः भाय्या भजनत दयावःसां मैथिली भाय्या भजनयात नं निरन्तरता बियातःगु जुइफु ।'

थन भजन हाः वइपिं मध्ये नांजाःम्ह गायक प्रेमध्वज प्रधानया मां प्राणमाया प्रधान व मदुम्ह कृष्णबहादुर अमात्यपिं लुमंके बहः जू। मय्जु प्राणमाया ला थम्हं हे हार्मोनियम थानाः म्येँ हालादीम्ह खः। मय्जु प्रधान व भाजु अमात्यं थःगु ज्यूताःछिं हे भजनयात आर्थिक ग्वाहालि नापं यानादीगु दु। अमात्यजुया काय्पिंसं ला थौंतक नं आर्थिक ग्वाहालि याना हे च्वंगु दनि। स्थायी आर्थिक स्रोतया व्यवस्था मदुसां भक्तजनपिनि श्रद्धां हे भजन खलःया आर्थिक स्रोत चूलानाच्वंगु दु ।

यँयाःज्वःछि आजुद्यःया न्ह्यःने दबू हे ग्वयाः च्यान्हुयंकं भजन हायेकेगु चलन आःतकं दनि। थन ग्वसाः खलः जक मखु स्वनिगःया थीथी थासय् च्वंगु भजन खलःतय्त समेत ब्वनाः च्यान्हुयंकं भजन हायेकीगु खः। थुबलय् येँ, यल, ख्वप, थिमि, पांगा, भ्वँतया भजन खलःतय्सं समेत ब्वति कायेगु याइ। यँयाः वल कि वंद्यः त्वाःया छगू आकर्षणया केन्द्र थ्व भजन नं जुइ। थन उकथं दबू हे ग्वयाः भजन हायेकेगु नं तसकं पुलांगु चलन खः ।

थुगुसी येँयाःबलय् अन श्री सिद्धि शालिग्राम, वृद्धाश्रम भजन खलः (ख्वप), पशुपतिनाथ मुक्तिनाथ मण्डप (पशुपति), चण्डेश्वरी भजन खलः (भ्वँत), कुमारी साइबाबा भजन मण्डल (मरु), मछिन्द्रनाथ भजन खलः (जनबहाः), महालक्ष्मी भजन मण्डलं (सक्व) ब्वति काःगु खः। श्री इन्द्र जवाहर सहयोग गुथिया ग्वसालय् प्रत्येक भजन खलःयात झिद्वः तका दां नं लःल्हायेगु ज्याझ्वः जूगु खः। थुकिं अन ब्वति काः वइगु भजन खलःयात उत्साहित याइगु आशा याःगु दु। भविष्यय् थज्याःगु हे मेमेगु नं कुतलं नं थाय् काइगु खँय् नायः भाजुं भलसा प्वंकादीगु खः। उगु च्यान्हुयंकं जुइगु भजन ज्या-वःयात थ्यंमथ्यं छगू लख दां खर्च जुइगु जुयाच्वन ।

भजन धइगु दकलय् न्हापां भक्तिया साधन अनं लिपा जक मनोरञ्जनया साधन खः। वयां लिपा संगीत साधनया कलाया रुपय् नं भजन प्रख्यात जुजुं वनाच्वंगु दु। मनयात आनन्द जुइगु जुयाः भजन स्वस्थ जीवनया साधन नं जुइफुगु खँ भजन गायक भाजु मोक्षबहादुर अमात्यं कनादी ।

More Stories Like this