उलि धयाः व अलप जुइ...

नर्मदेश्वर प्रधान

खँयाखँय्
उकुन्हु। अखबारय् प्रधानमन्त्री माधवकुमार नेपालया किपा खनी। आइसक्रिम फ्ययाच्वंगु। न्हूगु आइसक्रिम विमोचन जूगु खनिं। वहे पितब्वज्याया किपा जुयाच्वन। थौंकन्हय् प्रयोगया जमाना। उद्घाटन शैलीइ नं न्हू न्हूगु पहः खने दइ। त्वाःदेवा च्याकेगु। रिबन चायेगु। थ्व पुलांगु शैली जुइ। द्वालुसे च्वने धुंकी। न्हून्हूगु सवाः। आकर्षण ज्वनाः न्हून्हूगु उद्घाटन शैली खनेदइ। न्हूगु आइसक्रिम उद्योगया उद्घाटन। प्रमजुपाखें। न्हूगु शैली। प्रमजुयात आइसक्रिम फ्ययेकी। उद्घाटन याइ। उकिया हे किपा। उद्घाटनया न्हूगु पहः। मूपाहांयात दकलय् न्हापां नं स्वकी। थ्व उद्घाटन। जरुर न्हूगु प्रयोग जुइ। जिं बिचाः याना ।

तर। छाय् थें मसिउ गुकुन्हु प्रम नेपालं आइसक्रिम फ्ययाच्वंगु तस्बिर खनी। जिगु ल्हाः चासुइ। छुं च्वये। च्वये हे माः। मतिइ उकुसमुकुस जुइ। अय्नं नुगः चिना तये। छन्हु। काठमाडाै पोष्टय् छम्ह भाजुं सम्पादकयात पौ च्वयाहइ। माकुने भाजुं आइसक्रिम चुचु प्यानाच्वंगु किपायात कयाः। भाजुं असन्तोष व आक्रोश व्यक्त याइ। माकुने 'जोकर'। वं हिस्याइ। देशय् गुज्वःगु गुज्वःगु उद्योगया उद्घाटन यायेमाःम्ह प्रधानमन्त्री आइसक्रिमया उद्घाटनय् व्यस्त। कुंखिनी ।

पत्र ब्वने। चिनातयागु जिगु नुगः ब्यनी। दिकातयागु च्वसु सनी। जितः नं छुं धाये मास्ते वइ। छुं च्वये मास्ते वइ। भाजु माधवकुमार नेपाल। थौंकन्हय् प्रधानमन्त्री ला खः। तर कामचलाउ प्रधानमन्त्री। वय्कः प्रधानमन्त्री मखु। धाये फइ मखु। खः। पूरा खः। धाये नं जी मखु। खः-मखुया दथुइ वय्कः। थ्व स्थितिइ शायद वय्कःयात उलि जिम्मेवारी बोध यायेम्वाः जुइ। फुर्सद गाक्कं दु जुइ। उद्घाटन यायेत वय्कःयात व्यस्ततां मपं जुइ। जरुर आइसक्रिम उत्पादकं प्रमजुया फुर्सदयात कदर याइ। मू पाहां याइ। उद्घाटन याकी। सम्मान व्यक्त याइ ।

जितः धाःसा मतिइ म्वाःमदुगु खँ लुयाच्वनी। खँ थुइके मफुगु खः ला? वा नकारात्मक सोचया छुमां खः ला? खँ न्यने। लिच्वः उकिया अःखः लाइ। च्वसु चासुइ। कुंखिने मास्ते वइ। प्रधानमन्त्रीं आइसक्रिम फ्ययाः उद्घाटन यानाच्वंगु किपा। न्ह्यःने। स्वस्वं अनेक बिचाः लुया वइ। अनेक बिम्ब दं वइ ।

व उखान लुमनी। 'नौया ज्या मंत कि खिचाया प्यनय् सँ खाकः जुइ।' कामचलाउ प्रधानमन्त्री। ज्या मदुम्ह नौचा थें जुइ। आइसक्रिमय् खिचाया प्यं बिम्ब लुइ। प्रधानमन्त्रीं आइसक्रिम नं स्वयाच्वंगु। सँ खाकाच्वंगु थें ताइ। जिगु थ्व अनुमान। कल्पना। ठीक। बेठीक। जिं मसिउ। तर जितः उकिं लिना हइ ।

आइसक्रिम। मेगु बिम्बय् परिणत जुइ। आइसक्रिम। थुकियात फ्यइ। फ्यफ्यं थ्व विलिन जुइ। तनावनी। फुइ। आइसक्रिम सहानुभूतिया विषय जुया बी। प्रधानमन्त्रीं आइसक्रिम फ्ययाच्वंगु किपा स्वये। देशया विद्यमान दशा खनी। नेतातसें फ्यफ्यं हे देश आइसक्रिम थें तनीगु खः ला? फुइगु खः ला? शून्यय् विलिन जुइगु खः ला? देश। आइसक्रिम बिम्ब। लने। जि वेचैन जुइ ।

जिं आइसक्रिम मनया। नये मजिउ। चिनी दुगु पदार्थ जिं मनया। प्रधानमन्त्रीं आइसक्रिम नयाच्वंगु फोटो खनी। पक्का जुइ। प्रम माधवकुमार नेपालयात चिनीया बन्देज मदु। चाकुगु नयेत। फ्ययेत वय्कःया स्वास्थ्यं बिउनि। चाकु बारे यायेमाःगु आवश्यकता मदुनि। वय्कःया किपां वय्कःया स्वास्थ्य स्थिति बांलाः। चिनी ल्वचं मथिउनि। संकेत याइ। चिनी ल्वय् दुगु जूसा आइसक्रिम फ्ययाः उद्घाटन यायेत वय्कःया स्वास्थ्यं मबीगु जुइ। आइसक्रिम मेपिं हे मू पाहांनं फ्यइगु जुइ। प्रधानमन्त्री। नेतातय्। स्वास्थ्य बांलाइगु देशया निंतिं उच्च मनोबलया खँ जुइ। थथे हे देशया उद्योग फस्टे जुइ। केक उद्योग। जूस उद्योग। हलुवा उद्योग चाली। प्रधानमन्त्रीजुपाखें उद्घाटन जुइ। प्रमजुं केक वांन्यानाच्वंगु, जूस त्वनाच्वंगु, हलुवा नयाच्वंगु किपात अखबारय् दइ। झीसं स्वये खनी। देशय् औद्योगिक विकास खनी। उत्साहित जुइ। लय्ताये ।

मिखा तिस्सी। बिचाः याये। यायां वने। प्रधानमन्त्रीं उद्घाटन याःगु आइसक्रिम। टिभीइ थुकिया विज्ञापन वइ। 'थ्व आइसक्रिम नल कि मचातय् आखः वइ। वृद्धत ल्याय्म्ह जुइ। यौनशक्ति वृद्धि जुइ। थ्व आइसक्रिम नयादिसँ। छेँय् लक्ष्मी दुहां वइ। मालामाल जुइ।' बहुरङ्गी विज्ञापन। वइ। आइसक्रिम खूब चुइ। आइसक्रिम साहु मालामाल जुइ। विज्ञापनया करामत। तर जनता ठगे जुइ। शोषित जुइ। मनय् लुइ। जनताया चिउताः तइम्ह सु? मसिउ ग्व !

यौन मनोवैज्ञानिक फ्रायड। वं संसारयात यौनमय खंकी। मचा बुइ। वं मांया दुरु चुचु प्याइ। दुरु चुचुप्याःगुयात फ्रायडं बाल मौखिक - मैथुन क्रिया खंकी। प्रमजुं त्याःचिंगु कोनय् आइसक्रिम तयाः फ्ययाच्वंगु तस्बिर लुमंके। फ्रायड न्ह्यःने दं वइ। फ्रायडं प्रमजुयात धयाच्वंगु ताइ। 'माधवजु ! थ्व आइसक्रिम फ्ययेगु नं मौखिक यौन क्रिया खः। फ्यःलिसे थुकिं आनन्द बी। सन्तोष बी। खूब फ्ययादिसँ। आनन्द कयादिसँ।' थुलि धयाः व अनं अलप जुइ ।

More Stories Like this