याकःचा ल्वानाच्वंगु चुनाव दिकेमाल

याकःचा ल्वानाः नं मत्याइगु चुनावया प्रतिस्पर्धा यानाः नेपाली कांग्रेसं संसार न्हीकेगु ज्या याःगु दु। सुं हे पार्टीं ब्वति मकाःगु जक मखु थःगु हे पार्टीया सकलें सभासदतय्सं तकं भोट मकुर्के धुंकूगु चुनावय् याकःचा ल्वायेगु भाजु रामचन्द्र पौडेलया अडानं वय्कःया मानसिक अवस्था तकं ठीक दुगु खः ला धइगु न्ह्यसः पिकाइगु स्थिति ब्वलंगु दु। थ्व ला हद दर्जाया राजनीतिक विकृति खः। वय्कलं चुनाव ल्वायेगु धयाच्वंत्तले न्ह्याक्व हे ई व ध्यबा फुके माःसां चुनाव याना हे च्वनेमाःगु जुयाः थुकिं मुक्कं राष्ट्रयात हे अनावश्यक ज्याय् तक्यंका तइगु निश्चित दु ।

थज्याःगु अवस्थाय् आः सकसियां सहमतिया लिधंसाय् न्हूगु लँपु मालेगु बाहेक मेगु विकल्प मदु। थ्व छगू कथंया राजनीतिक 'डेड लक' हे खः। थुकियात फुके यायेगु खःसा सहमति हे दकलय् प्रमुख खँ खः। यदि माल धाःसा प्रधानमन्त्री ल्ययेत न्हिंन्हिं हे चुनाव यायेगु खँ नं पिहां वयाच्वंगु दु। भाजु पौडेलं न्हिंन्हिं चुनाव जुल धाःसा न्हिंन्हिं हे ल्वानाच्वनेगु अभिव्यक्ति नं बियादीगु
दु। थ्व बांलाःगु खँ मखु। थुकियात पनेगु खःसा सभामुखं थःगु विशेष अधिकार प्रयोग यायेमाः धइगु खँ नं पिहां वयाच्वंगु दु। तर सभामुखं विशेष अधिकार प्रयोग याये मखु धयादीगु कारणं आः फुक्क हे दलत जानाः वय्कःयात विशेष अधिकार प्रयोगया लागिं इनाप यानाः जूसां छुं निकास पिकायेमाःगु खः ला? नेपालय् जुयाच्वंगु प्रधानमन्त्रीया थ्व चुनावं विश्वन्यंकं हे नेपाःया घोर बेइज्जत जुयाच्वंगु दु। राजनीतिक नेतातय्सं थ्व खँयात वाःचायेकाः सहमतिइ मवसें हे मगाःगु अवस्था आः वःगु दु ।

More Stories Like this