नेवा: देय् दबूया लोकतान्त्रिक सम्बाद् ज्याझ्वः

संविधानय् दुथ्याकेमाःगु थीथी बुँदात जनस्तरं मुंकेगु लागि थौं छगू ज्याझ्वःयासें थजाःगु सुझाव मुंकेगु ज्या जुल । युएनडिपिया ग्वहालिइ नेवाः देय् दबूया ग्वसालय् किपूया नगरमण्डप श्रीकीर्ति विहारय् जूगु थुगु ज्याझ्वलय् स्थानिय मनूतय्सं संविधानय् दुथ्याकेमाःगु थीथी बुँदाय् सहलह ब्याकूगु खः ।

येँ निर्वाचन क्षेत्र नं. १० या थीथी गाविस स्तरय् न्ह्याके धुंकूगु थजाःगु ज्याझ्वः आः क्षेत्रिय स्तरय् थथे न्ह्याकाः अनं वःगु दक्वं हे सुझाव त थ्व हे वइगु नोभेम्बर १ तारिख खुन्हु सम्बन्धित संविधान सभाय् पेश जुइगु खँ ग्वसाखलकं जानकारी बियादिल ।

मय्जुपिं रुकुमिणी महर्जन व रितु थापामगरजुं संविधानया मस्यौदाय् दुथ्याके धुंकूगु खँयात ध्वाकुइकादिसें थीथी गाविसय् जूगु ज्याझ्वलय् मुंकूगु सुझाव त न्ह्यवयादीगु खः नापं थुगु ज्याझ्वलय् वःगु सुझाव त नं मुंकाःदीगु खः ।

थौंया थुगु ज्याझ्वलय् येँय क्षेत्र नं. १० या समानुपातिक सभासद् एनेकपाया भाजु दिलिप महर्जन, नेपाली काँग्रेसया सभासद् भाजु आइ.पि. गुरुङ्ग, नेपाः राष्ट्रिय पार्टीया सभासद् भाजु बुद्ध सायमि व जनजाति महासंघया मूछ्यांजे भाजु आङ्गकाजी शेर्पा झायादीगु खः।

ज्याझ्वः नेवाः देय् दबूया नायः भाजु नरेश ताम्राकारया सभापतित्वय् दबूया मूछ्यांजे मय्जु रजनी महर्जनं न्ह्याकादीगु खः ।

More Stories Like this