मोहनि लिपा न्हूगु सरकार: प्रम

'संविधानया ताःचा माओवादीयाके, सरकारया ताःचा कांग्रेसयाके'

येँ (सन्ध्या टाइम्स)/प्रधानमन्त्री माधव नेपालं मोहनि लिपा जक न्हूगु सरकार दयेके फइगु अवस्था दु धयादीगु दु ।

प्रेस चौतारी मोरङं ग्वसाः ग्वःगु सोमवाःया ज्याझ्वलय् न्ववासें वय्कलं धयादिल, 'कन्हय् जुइगु प्रधानमन्त्री चुनावं नं न्हूगु सरकार दयेके फइ मखु, उकुन्हु गथे जूगु खः
कन्हय् नं अथे हे जुइ ।'

भाजु नेपालं प्रधानमन्त्रीया उम्मेदवार रामचन्द्र पौडेलया नां आःया हे अवस्थाय् लित कायेत एमालें धयाच्वंगु मदु धासें सहमति जुल धाःसा जक उम्मेदवारी लित कायेमाः धकाः नं धयादिल ।

सहमतिया नितिं मोहनिया इलय् नं थःपिं सक्रिय जुइत तयार दु धासें वय्कलं मोहनि नखः धुनेवं हे न्हूगु सरकार दयेके फइ धइगु खँय् थःपिं विश्वस्त जुयागु दु धकाः नं धयादिल। प्रधानमन्त्री नेपालं धयादिल, 'मोहनि नखः लिपा न्हूगु सरकार धकाः पत्रिकाय् हेड लाइन मजुइमा, थ्व जिं आशा जक यानागु खः ।'

आःया अवस्थाय् कांग्रेसया सहभागिता अले माओवादीया सहमति बिना न्हूगु सरकार दयेके फइ मखु धकाः नं वय्कलं स्पष्ट यानादिल। राजनीतिक कारणं अर्थतन्त्रय् लिच्वः लाके मजिउ धयादिसें वय्कलं आःया अवस्थाय् राजनीतिक कारणं हे देय्या अर्थतन्त्र धरासायी जुयाच्वंगु दु धकाः नं धयादिल ।

सरकार गठन यायेत सहमति नं याये मफइगु अले कामचलाउ सरकारं बजेट नं हयेके बी मखु नं धकाः अडान काल धाःसा नेपाःया अर्थतन्त्र तहस नहस जुइगु ख्याच्वः नं वय्कलं बियादिल।आःया अवस्थाय् शान्ति प्रक्रिया व न्हूगु संविधान निर्माण यायेगु निंतिं माःगु ताःचा एकीकृत माओवादीयाके दुगु अले न्हूगु सरकार दयेकेगु निंतिं माःगु ताःचा चाहिं नेपाली कांग्रेसयाके दुगु जुयाः सुयाके ताःचा दु वहे दलं भूमिका म्हितेमाः धकाः नं वय्कलं धयादिल ।