संवैधानिक समितिया अध्यक्षया चेतावनी
संविधानसभाय् संविधान दयेकेत स्वनातःगु दकलय् महत्वपूर्ण संवैधानिक समितिया अध्यक्ष निलाम्बर आचार्यं यदि मेगु निला नं दलतय्सं संविधानसभाया ई थथे हे सितिकं छ्वयाच्वन धाःसा वयां लिपा संविधान हे दयेके फइ मखु धकाः बियादीगु चेतावनीयात राजनीतिक दलतय्सं गुकथं काल खः मसिउ। मूल संविधान च्वयेगु जिम्मा कयातःम्ह मनुखं धाःगु थ्व खँयात ख्याःया रुपय् जक कायेगु पाय्छि जुइ मखु। नेतातय्सं इलय् हे संविधान दयेके धकाः न्ह्याक्व हे फुर्ति याःसां संविधान दयेकीम्ह मनुखं हे दयेके फइ मखु धायेधुंकल कि अज्याःगु फुर्तिया अर्थ मदइगु खँ स्वाभाविक खः गुगु झीसं न्हापा नं भोगे हे यायेधुनागु खँ खः। देशय् प्रधानमन्त्री ल्ययेगु धकाः जुयाच्वंगु निरर्थक कुतःया कारणं संविधान दयेकेगु महत्वपूर्ण ज्या हे छखे छखे लानाच्वंगु सन्दर्भय् वय्कलं धयादीगु थ्व खँ धाथें नं खतराया संकेत खः। वय्कःया थ्व धापू संविधान दयेकेगुपाखे पटक्क हे ध्यान मबिसे च्वनाच्वंपिं नेतातय्त बिउगु ख्याच्वः नं खः। थौं देय्या नेतातय्सं संविधान दयेके मानि धइगु खँ गनं उल्लेख तकं हे मयाये धुंकूगु थ्व दुःखद् इलय् वय्कःया थज्याःगु धापू वयाच्वंगु खः। वय्कलं थथे धायेधुंकाः नं यदि दलतय्सं संविधान दयेकेगुपाखे बिचाः मयात धाःसा थ्व दल व उकिया नेतातय्सं देय्या न्हूगु संविधान दयेकाः नइ धकाः जनतां आशा मयाःसां जी। वास्तवय् थौं देशय् न्हूगु संविधान मदयेकेगु लागिं फुक्क दलतय्सं 'सहमति' हे दयेकाः थ्व ल्वापुया नाटक जकं यानाच्वंगु खः लाकि धइगु शंका नं पिहां वयाच्वंगु दु। यदि मखुसा सरकार त्वःताः दलत संविधानपाखे लगे जुइमाःगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
