झीत झीगु हे राष्ट्रिय न्हिपौ माल

ह्दयप्रसाद मिश्र

खय्त ला थन नेवाःतय्गु ततःधंगु संस्था व संगठनत मदुगु नं मखु, अय्नं थुगु क्षेत्रय् सुनानं गम्भीर जुयाः विचाः यानाच्वंगु अवस्था धाःसा मदु।

देय् गणतन्त्रया लँपुइ खासा पहलं न्ह्यानाच्वंगु दु। अय्नं वर्तमान ई व परिस्थितिया अवलोकन यायेगु खःसा पूर्ण रुपं धुक्क जुइगु सम्भावनाय् नं न्ह्यसः चिं तने मफुनि। अझ धायेगु खःसा बुलुगु राजनीतिं यानाः प्रत्येक स्वायत्त राज्यया दावेदार व हकदारतय्सं सर्गतय् प्रकाशमय सुर्द्यःयात खंके फयाच्वंगु मदुनि। अथे खःसां नं स्वाभिमान योद्धात थःथःगु ध्वाँय् ज्वनाः अडिग जुयाः फटाफट न्ह्यानाच्वंगु हे दु। आपालं पंगः, कचिंगः व चुल्लुसेच्वंगु ध्याचःगु लँपुइ नं उसिंमचासे निरन्तर रुपं आज्जुइ थ्यंकेगु प्रणलिसे न्ह्याना हे च्वंगु दु। सकल नेपाःमिया निंतिं थ्व छगू ऐतिहासिक पलाः हे जुया बिउगु दु ।

स्वनिगःया नेवाःत नं इन्कलाबया सः ज्वनाः पलाः न्ह्याकाच्वंगु दु। गुगु नं इन्कलाबया सः बुलन्द यायेया निंतिं सञ्चार माध्यमया योगदानं अचूक ब्रम्हास्त्रया ज्या यानाच्वंगु दइ तर नेवाःतय्गु सन्दर्भय् धायेगु खःसा थुकिया ख्यः उलि शक्तिशाली खने दयाच्वंगु मदु। गुगु इलय् तक सञ्चार माध्यम सशक्त जुइ मखु उगु इलय् तक जनमानसय् चेतना ब्वलंकेगु व सचेत यायेगु ज्या पूवनी मखु। नेपालभाषाया सञ्चार माध्यम मात्र एस.एल.सी. सेकेण्ड डिभिजन वःम्ह विद्यार्थी थें जक जुयाच्वंगु दु, न पास धाये छिं, न त फेल हे धायेगु पाय्छि जुइ। अथे जुयाः नेवाः स्वायत्त राज्यया सः देय्या कुं�कुलामय् थ्यंकेया निंतिं छगू राष्ट्रिय दैनिक आवश्यक जक मखुसे अत्यावश्यक जुयाच्वंगु दु ।

सुथया च्या त्वनेगु इलय् हरेक नेवाःया ल्हातय् गोरखापत्र, कान्तिपुर, अन्नपूर्ण पोष्ट थेंज्याःगु छगू नेवाः राष्ट्रिय दैनिक मदयेक मगाःगु महसुस थौंया इलं यानाच्वंगु दु। विश्वभूमि, सन्ध्या टाइम्स आदि लिपा पिहांवःगु मेमेगु भाय्या राष्ट्रिय दैनिकया 'कार' गयेगु अवस्थाय् थ्यनेधुंकूगु दुसा नेपालभाषाया न्हिपौ सन्ध्या टाइम्सया धाःसा गतिलाःगु 'साइकल' नं गये मफुगु अवस्था जुयाच्वंगु दु। थ्व ध्रुव सत्यया जिम्मा काइम्ह सु? थुकिया लिसः बीम्ह सु? थुगु न्ह्यसःया लिसःया खँ ल्ह्वनेगु खःसा साधारण नेवाःतय्गु ला छु खँ ल्हायेगु नेवाः स्वायत्त राज्य धकाः चिल्लाय् चिल्लाय् दनाः हाला जूपिंसं नं काचाक्क बी फयाच्वंगु मदु। १७ लाख नेवाःत दुगु थासय् न्याद्वः�झिद्वः पत्रिका मी मफुगु अवस्थायात विडम्बना
बाहेक मेगु छु नां बीगु?

नेवाःत सबल-सक्षम हे जुयाच्वंगु दु। अझ धायेगु खःसा थन इमिगु बाहुल्यता मदुगु नं मखु। अथे खयां नं नेवाः साहु, महाजनतय्सं थःगु भाय्यात स्वयाः अप्वः प्राथमिकता बियाः मेमेगु भाय्या पत्रिकायात ब्वाँय्-ब्वाँय् जुयाः विज्ञापन बियाच्वं थें थःगु भाय्या पत्रिकायात नं ग्वाहालि यायेमाः धयागु विचाः याःगु जूसा थुगु ख्यःया निंतिं रामवाण वासः हे जूवनीगु खः। कतःया छेँ न्ह्याक्व हे बांलाःसां आखिर झीपिं च्वनेत ला झीगु थःगु हे छेँ माः धयागु खँ थुइकेगु बुद्धिमत्ता जुइ। झी नेवाःतय्गु सः सकल नेवाःतय्गु न्ह्यःने थ्यंकेगु खःसा दकलय् न्हापा इलेक्ट्रोनिक मिडिया व प्रिन्ट मिडियाया विकास यानाः मिडिया सेक्टरयात बल्लाके माःगु आवश्यकता जुयाच्वंगु दु। थौंतक नं 'स्टार न्यूज' व 'दूरदर्शन' थें जाःगु भारतीय न्यूज च्यानलत आः तक नं थुलि शक्तिशाली जुयाच्वंगु अवस्था दु कि इपिं खनाः नेता, सरकार, व पुलिस जक ग्याःगु मखु कि छुं नं कथंया मुद्दाया निर्णयया चरमचुली थ्यंकेया निंतिं नं तिबः बियाच्वंगु दु। पत्रपत्रिकाय् पंजाव केशरी, हिन्दुस्तान टाइम्स थुकिया दसु खः। उकिं गुगुं नं क्षेत्रय् संघर्ष यानाः सफलता प्राप्त यायेगु निंतिं दकलय् न्हापां मिडियायात बल्लाकेमाः। जनमानसया मछिं मनिंगु प्रिजेन्टेसन जक मखु छुं नं महत्वपूर्ण सन्देशयात इमि दथुइ थ्यंकेगु ज्या नं मिडियां हे यानाच्वंगु दइ
।
खय्त ला थन नेवाःतय्गु ततःधंगु संस्था व संगठनत मदुगु नं मखु, अय्नं थुगु क्षेत्रय् सुनानं गम्भीर जुयाः विचाः यानाच्वंगु अवस्था धाःसा मदु। उकिं वर्तमान अवस्थाय् दुगुयात संरक्षण संबर्द्धन यायेगु मस्वसे कन्हय् मेगु दयेकेगु कुतः याःसां उकिं बांलाइ धयागु खँय् छुं नं कथंया ग्यारेन्टी मदु। थौंकन्हय् पिहां वयाच्वंगु नेवाःतय् छगू राष्ट्रिय न्हिपौ 'सन्ध्या टाइम्स' या खँ ल्हायेगु खःसा घुरघुर�घुरघुर जुयाः स्टार्ट बन्द जुयाः ध्याक्क दीत्यंगु गाडीया अवस्थाय् थ्यनाच्वंगु दु। उकिं झी सकलें जानाः तःधंगु साइजया झीगु स्वतन्त्र व निष्पक्ष राष्ट्रिय न्हिपौ छगू सुथांलाक्क पिकायेगु हथाय् हे जुइधुंकूगु दु। थ्व खँय् झी सकसियां म्हुतुं छगू हे सः जुयाः पिहां वयेमाःगु दु "झीत झीगु हे राष्ट्रिय न्हिपौ छगू माःगु दु" ।

More Stories Like this