शिवप्रसाद खुब न्हिल...

नर्मदेश्वर प्रधान

खँयाखँय्

नर्भिक। नांजाःगु ह्दयरोग उपचार केन्द्र। डा. भरत रावत। थ्व केन्द्रया नांजाःम्ह डाक्टर। अनेक ज्याखँय् डाक्टर रावतलिसे सम्पर्कय् वये नं। डाक्टरया जनसम्पर्क तसकं हे बल्लाः। डाक्टर रावतया छगू सूत्र दु। सकसितं धाइ वं ह्दयरोगं मुक्त जुइगु खःसा न्हिं झिकः न्हिउ। अनिवार्यकथं। रोगं थी धुंकूपिं व मथिउनिपिं। फुइँक कम से कम झिकः न्हिले हे माः। न्हिं झिकः। निनाः हे। न्हिलेगु वासः खः। प्रतिरोधात्मक। उपचारात्मक। निगुलिं ज्या न्हिलाः बी। डाक्टरया सल्लाह पाय्छि हे जुइ। डाक्टरी हिसाबं थ्वयात विवाद यायेथाय् मदये फु। फुसा झिकः जक छाय्। न्हिंन्हिं हे मदिक्क न्हिलाः च्वनेदःसा जिउ। न्हिले मयःपिं सु दइ?

धाये अःपु धरोहरा तःपु। डाक्टर रावतया सूत्र न्यने। सल्लाह लुमंके। न्हिलेमास्ते वइ। लसतां मखु। गजबगु खँ न्यनेबलय् थें। छु धाःगु थ्व डाक्टरं। धात्थें धाःगु लाकि, मनूतय्त अःखतं हायेकूगु खः? फी पचे यायेगु कुटनीति जकं खः ला? वया धापू। ब्यङ्ग थें ताइ। न्हिले माः। मतिइ लुइ। वं धयां जी ला। वया धयां गाः। न्हिले धयां जी ला। न्हिलेत कारण माः। परिस्थिति माः। बिना कारण न्हिं झिकः न्हिलेत वँय् उइँ जुइ मानि। डाक्टरं धाः थें अकारण याकःचा न्हिलकि खंपिसं छु धाइ? सुर तंम्ह, तार चब्बूम्ह मधाइ ला? ईब्यः मदयेक न्हिलाः च्वनेत। तस्वीरया न्हिला जुइ मानि। न्हिलाच्वंगु तस्वीर, मूर्ति जक मदिक्क न्हिलाच्वनी। नुगः। मन। तस्वीर थें गथे जुइ फइ? निर्जीव किपा, मूर्ति मखु मन। छगू हे स्थितिइ, मुद्राय् थ्व च्वने फइ मखु। मन जड मखु। व न्हिली। ख्वइ। अथें मखु। कारण दइ। ख्वयेगु। न्हिलेगु। प्रतिक्रियात्मक कार्य खः। मन यस्सें न्हिली मखु। यस्से ख्वइ मखु। ख्वयेत। न्हिलेत। कारण माः। त्वह माः। परिस्थिति माः। न्हिं झिकः न्हिलेगु डाक्टरी हिसावं ठीक जुइफु। तर व्यावहारिक अनुकूलता नं माः। डाक्टरं फर्मे यायेवं व सम्भव जुइ मखु ।

डाक्टर रावतया सल्लाह लुमंके। लाटाबुंगे न्ह्यःने दं वइ। लाटाबुंगेया बाखं। लाटाबुंगेयात बौम्हं धाइ, 'बाबु, ससलय् वनेबलय् न्हिला जक च्वँ खं ला।' लाटाबुंगे ससलय् वनी। लाटाबुंगेया ससः अबुं थुगुसी थःत जूगु दुःख कनी। सम्पत्ति क्षति जूगु खँ धाइ। लाटाबुंगेया ससः अबुं नुगः मछिंक खँ ल्हाइ। लाटाबुंगे मुसुमुसु न्हिलाच्वनी। बौम्हं स्यना हःगु शतप्रतिशत पालन याइ। डाक्टर
रावतया मन्त्र लुमनी। न्हिं झिकः न्हिलेमाः। मतिइ लुइ। थ्व मन्त्र लाटाबुंगेयात सम्भव जुइ। एकीन याये। लाटाबुंगेत नुगःचुया ल्वचं सुरक्षित जुइ। तर डाक्टर रावत ? नुगःचुया ल्वचं सुरक्षित जुइया नामय् जिपिं गथे लाटाबुंगे जुइ फइ? गय् यन्त्रवत न्हिला जुइ?
न्हिं झिकः न्हिलेमाः। अले नुगःचुया ल्वचं बचे जुइ फइ। थ्व गुरुमन्त्र। खः थें च्वनी। प्रचार याये। शौंख जुइ। सकसितं धाये। घ्वाये। न्हिलेमाः। न्हिला वासः खः। अमृत खः। नाय्खिं च्वयेके। मन जुइ। तर...........

वय्कः। जि थः। जिजादाजु। निनीया जिलाजं। तस्सकं हे भद्र। सन्तोषी। न्ह्याबलें न्हिउख्वाः। उमेर वनेधुंकी। स्वस्थ। अचानक काये मदइ। ह्दयघातं। उमेर वंकाः। मन चीगु। आनन्दी जुइगु। मन मब्वयेकेगु। सुखया लँपु खः। सकसिनं धाइ। मन चिनाः जक गन सुख जुइ? आनन्द वइ? दुःख गनं वइ गनं। वया अवस्था। थज्याःगु आघात। नाप लाइ। शोकग्रस्त। ख्वालय् न्हिला तनी। न्हिं झिकः न्हिलेमाः। स्वस्थ जुइ। डा. रावतया वचन। लुमनी। जिजादाजुयात धाये ला थें जुइ। तर जिं म्हुतुप्वाः कत्ताक्क ती। म्हुतुं व पिहां वइ। जि त्रसित जुइ ।

जिमि तःमां न्हिलेमाः। लय्ताये माः। डाक्टरया सूत्र न्यनाः मखु। थःगु स्वभावं हे। कायम्ह्याय् तःधिकः जुइ। काय्या ब्याहा यायेमाल। म्ह्याय्या ब्याहा यायेगु दायित्वबोधं चिना हइ। गम्भीर जुइ। म्ह्याय् इलय् बी मफइ। चिन्ता जुइ। कायया म्ह्याय्या ब्याहा सिधइ। सकसिनं धाइ। मस्तय् ज्या सिधल। याउँल। आनन्दं च्वनादिसँ। भार मुक्त जुल। पीर, चिन्तां मुक्त जुल। यथार्थय् अथे जुइ मखु। म्ह्याचं दुःख सिल। चांन्हिं मांयात पीरं त्वःती मखु। म्ह्याय् वइ। वँचुगु नीलदाम। भाःतं दायाहःगु क्यनी। छन्हु मखु। निन्हु मखु। तःमांया ख्वालय् रङ्ग हिली। सुपाचं त्वपुइ। तःफय् वइ। वया दिन चर्या ख्वयेगु जुइ। झसुकाः तयेगु जुइ। शरीर गले जुइ। पीरं त्वःती मखु। लिनाच्वनी। डाक्टर लुमनी। न्हिं झिकः न्हिलेमाः। स्वस्थ जुइ। तःमांयाथाय् वने। मन्त्र कने मास्ते वइ। धायेत स्वये। धाये फइ मखु।
उमेश ल्याय्म्ह हे धाये मल्वः। सदां झुके जुइ। अमेरिकाय् वनेत भिसा काये फइ मखु। ज्योतिप्रसादया सम्पत्ति। वया दाजुं नया बी। वं नालिस तइ। न्हियान्हिथं व तारिखय् वनी। वया निंतिं सुख धइगु हे मुद्दा ल्वायेगु जुया बी। हरिमाया छग्वारा। गनं वने मफु। वातया ल्वचं पीडित। सरिता न्हियान्हिथं ख्वया जुइ। यःम्ह मिजनं वयात धोका बिल धकाः। दिनेशया निम्हतिपू। ज्याथजिथि। भुग्लुं
च्वनी। कायपिं फुक्क अमेरिकाय्। बैङ्कय् ध्यबा त्याये काइ। मोटर न्याइ। गइ। हरिप्रसाद थौंकन्हय् फाताफाता। त्याय् काःगु पुलेत वयात धौधौ। सिंहमान व वया कलाःया ख्वाः हे चमकं। सुचं हे मबिसे म्ह्याय्म्ह मेले वनी। सरितां भाःतयात कचकच याइ। न्हूगु छेँ दनेमाल। गय् यानाः दयेके? मिजं हीमी चाइ। प्यखेरं तनाव। पीडा। दुःख। समस्या। हाथ्या। अस्वस्थता। डा. रावतया सूत्र लुमनी। न्हिं झिकः न्हिलेमाः। तनाव मुक्त जुइ। स्वस्थ जुइ। डा. रावतं अन्तर्वार्ता बी। टिभीइ नवाइ। तर फुक्क फय्गं थें ताइ। छाय् थें मसिउ ।

शिवप्रसादया काय सी। व बेहोस जुइ। होसय् वइ। व ख्वइ। साप ख्वइ। काय्या शोकं व वँय् थें जुइ। वया सुर तनी। चांन्हिं दु:िखत जुइ। छुं दँ लिपा। वया मेम्ह काय नं सी। मदइ। तर आश्चर्य। व ख्वइ मखु। वं छफुति ख्वबि हे हायेकी मखु। वं काय्यात चिताय् तइ। मि तइ। वयाके भ्याःभति नं शोकभाव खने दइ मखु। वं विचाः याइ। 'संसार थ्व हे खः।' वं चिताय् कुली। मि दनदन छ्वयेकी। शोक रहित। विना तनाव। मसानय् शिवप्रसाद न्हिली। खुब न्हिली। वया काय नौ जुइ। नौ चुइकी। व न्हिली। खुब न्हिली। मात्र न्हिली। सकसिनं धाइ पुत्रशोकय् शिवप्रसाद वँय् जुल। काय सीगु खँ वं जितः नं कनी। कनी। न्हिली। न्हिली। कनी। व न्हिउगु उन्माद खः वा प्रज्ञा। जिं अझं तिफ्याये मफुनि ।

More Stories Like this