प्रचण्डया शंकास्पद मलेशिया भ्रमण

संसदय् दकलय् तःधंगु पार्टी माओवादीया अध्यक्ष प्रचण्ड आकाझाकां मलेशिया भ्रमणय् वंगु खँयात कयाः थीथी कथंया टिकाटिप्पणी जुयाच्वंगु दु। खास यानाः देशय् न्हूगु सरकार गठनया लागिं कुतः जुयाच्वंगु व उकिया लागिं महत्वपूर्ण जिम्मा समेत दुम्ह नेता देय्या समस्यायात थातिं तयाः विदेश भ्रमणय् वंगु कारणं थुकिया बारे अनेक खँ पिहां वःगु खः गुगु स्वाभाविक नं खः। लिसें वय्कःया मलेशिया भ्रमण तसकं शंकास्पद नं जुया बिउगु दु। छाय्धाःसां वय्कः वास्तवय् छु ज्याया लागिं मलेशिया झाःगु धइगु खँ हे सुनां मसिउ। थुकिया बारे थीथी मनूतय्सं थीथी कथंया हे खँ तयेगु यानाच्वंगु दु। स्वयम् माओवादी पार्टी दुने तकं वय्कःया भ्रमण बारे छगू हे खँ पिहां वयाच्वंगु मदु ।

मेखे थ्वहे इलय् पुलांम्ह युवराज पारस शाह नं थ्वहे इलय् मलेशिया वनाच्वन धइगु खँ पिहां वःगु दु। उकिया लागिं मेपिं नं छुं जुजुवादीत मलेशिया थ्यनाच्वन धइगु खँ दु। थ्व 'संयोग' या दथुइ मनूतय्सं वय्कः वास्तवय् पारस शाहयात हे नापलानाः हानं राजतन्त्र लित हयेगु बारे खँ ल्हाः वनाच्वंगु धकाः नं शंका याना हःगु दु। देशय् सांस्कृतिक राजतन्त्र स्वीकार यायेगु लँय् माओवादी वनाच्वन धकाः चर्चा जुयाच्वंगु दु। थज्याःगु अवस्थाय् अध्यक्ष प्रचण्डया भ्रमण शंकास्पद जुइगु स्वाभाविक खः। यदि वय्कः धाथें पुलांपिं जुजु खलःयात नापलायेत हे मलेशिया झाःगु खःसा थ्व तसकं दुःखपूर्ण खँ जुइ। वनेधुंकूगु राजतन्त्र लित हयेगु कल्पना तक नं यायेगु जनतायात धोका बीगु खः। न्ह्यागु हे तर्क तःसां नं थुकियात स्वीकार याये मफइगु खँ माओवादीं थुइकेमाः ।

More Stories Like this