मेगु निला नं फुत धाःसा संविधान दयेके फइ मखु:सभापति आचार्य
येँ (सन्ध्या टाइम्स)/ संविधानसभा दुनेया संवैधानिक समितिया सभापति निलाम्बर आचार्यं आः निला तक नं संविधान दयेकेगु ज्या मयासे आः थें हे यानाच्वन धाःसा अनं लिपा संविधान दयेकेगु धकाः कुतः याःसां नं संविधान दयेके फइगु अवस्था दइ मखु धयादीगु दु। थौं सुथय् येँय् छगू ज्याझ्वलय् न्ववासें सभापति आचार्यं अथे धयादीगु खः ।
न्हूगु संविधान निर्माणया ज्या यायेगु लकस आः तक नं तयार जूगु मदुनि धासें वय्कलं आ निला तक नं दलतय्सं सहमति मयासे अथे हे यानाः ई फुकाच्वन धाःसा अनं लिपा क्वःछिना तःगु इलय् संविधान दयेके हे फइ मखु धकाः दावी यानादीगु खः। राजनीतिक दलतय् दथुइ सहमति यायेमाःगु खँय् वय्कलं बः बियादिल ।
संविधानसभाया म्याद दछिया निंतिं थप याःगु प्यला दयेधुंकूगु अवस्थाय् नं दलतय् दथुइ सहमति मजुयाः फुक्क ज्या दिनाच्वंगु नापं म्हिगः जक संविधानसभाया अध्यक्ष सुवासचन्द्र नेम्वाङं संविधानसभाय् दुथ्याःगु नीन्हय्गू हे दलया शीर्ष नेतातय्त सःताः वइगु असोजया दुने ल्यं दनिगु फुक्क हे विषयगत समितिया प्रतिवेदनयात कयाः संविधानसभाय् सहलह ब्याकाः संवैधानिक समितिइ छ्वयेगु धकाः सहमति ब्वलंकूगु खः। वहे सहमति कथं दलतय्गु दथुइ हाकनं कन्हय् मुँज्या च्वनीगु नापं उगु मुँज्याय् राज्यया शासहीय स्वरुपया बारे सहलह जुइगु खँ जनमोर्चा नेपालया अध्यक्ष नापं सभासद चित्र बहादुर केसीं धयादीगु दु ।
वय्कलं 'सन्ध्या टाइम्स' लिसे खँल्हासें दलतय् दथइ सहमति जुइ धंकाः जक संविधानसभाया मुँज्या जुइगु खँ नं कनादिल ।
