माओवादी इन्चार्ज गिरफ्तार
तत्काल त्वःतेत माग यासें सिन्धुली बन्द
येँ (सन्ध्या टाइम्स)/एकीकृत माओवादीया सिन्धुली जिल्लाया सह इन्चार्ज राजन दहालयात थौं सुथय् प्रहरीं ज्वंगु दु। सुथय् ८ ताः इलय् प्रहरीं सदरमुकाम सिन्धुलीमाडी लागां दहालयात ज्वनागु खँ सिन्धुली प्रहरीं धाःगु दु ।
उखे दहालयात ज्वंगुया विरोध यासें वयात तत्काल बिना शर्त त्वःतेत माग यासें माओवादी कार्यकर्तातय्सं थौं सिन्धुली जिल्ला बन्दया आह्वान याःगु दु ।
माओवादी कार्यकर्तातय्सं थाय् थासय् प्रदर्शन यानाः जिल्ला बन्द याःगुलिं अनया जनजीवन प्रभावित जूगु दु।
गृहमन्त्री भिम रावलया तप्यंक निर्देशनय् माओवादी कार्यकर्ता दहालयात प्रहरीं ज्वंगु द्वपं माओवादीया सिन्धुली कमिटीं बिउगु दु ।
उखे प्रहरीं धाःसा दछि न्ह्यः एमाले महासचिव ईश्वर पोखरेलयात आक्रमण याःगु द्वपनय् दहालयात ज्वनागु खँ धाःगु दु। वंगु दँया जेष्ठ ४ गते सिन्धुलीइ जूगु छगू ज्याझ्वलय् ब्वति काः वःम्ह एमालेया महासचिव पोखरेलयात रामेछापया कात्ले भिर लागाय् अप्पां कयेकाः स्यायेगु नियतं आक्रमण याःगु घटनाय् माओवादी कार्यकर्ता दहालया नं ल्हाः दुगुलिं वयात ज्वनागु खँ नं प्रहरीं धाःगु दु ।
मेखे कार्यकर्तातय्सं धाःसा थःगु पार्टीयात प्यखेरं पेले याना यंकेगु नियत कथं सरकारं थ्व ज्वनेगु ज्या याःगु द्वपं बिउगु दु ।
माओवादी कार्यकर्ता बेपत्ता
एकीकृत माओवादीया लमजुङ जिल्लाया कार्यालय सचिव देवेन्द्र पौडेल स्वन्हु न्ह्यवंनिसें बेपत्ता जुयाच्वंगु दु। पौडेल वंगु विहिवाः न्हिनय् २ बजेनिसें सम्पर्कय् मदुगु खँ माओवादीया लमजुङ कमिटीं धाःगु दु। तनहुँया डुम्रे लागाय् पासां सःतल धकाः लमजुङं वंम्ह पौडल अपहरणय् लाःगु आशंका याःगु दु। वय्कःया मोबाइलया स्वीच नं अफ यानातःगु दु। पौडेल सम्पर्कविहिन जूगुलिं वय्कःया छेँजःपिं चिन्तित जुयाच्वंगु दु। पौडेलयात मालेगु ज्या माओवादी पार्टी व प्रहरीं नं यानाच्वंगु दु ।
