राष्ट्रपतिया ज्याय् सर्वोच्चया फैसला

तत्कालिन प्रधानसेनापति रुक्मांगत कटवालयात चीकेगु धकाः तत्कालिन प्रधानमन्त्री प्रचण्डया सरकारं याःगु निर्णययात राष्ट्रपति डा. रामवरण यादवं पना बिउगु ज्यायात सर्वोच्च अदालतं नं वैधता प्रदान याःगु दु। तर सर्वोच्च अदालतया थ्व फैसला थौं अज्याःगु इलय् वयाः पिहां वःगु दु गबलय् कि थुकिया छुं औचित्य हे मदयेधुंकल। स्वयम् सर्वोच्चया फैसलाय् हे थ्व खँ आः प्रशंगहीन जुइधुंकूगु कारणं रिटयात कयाः वहस हे यानाच्वने म्वाःल धासें रिट समेत खारेज याना बिउगु खः। थुकिं सर्वोच्चं गज्याःगु फैसला बी धइगु खँय् जक मखु गुकथं फैसला बी धइगु खँय् नं न्ह्यसःचिं तये माःगु अवस्था वःगु दु। सर्वोच्च अदालतय् थ्व बारे रिट लानाच्वंगु यक्व हे दयेधुंकल। तर अदालतं उकियात थुलि ढिलाई याना बिल कि आः उगु फैसला न्ह्यागु हे वःसां नं उकिया औचित्य मदयेधुंकल। जब कि थ्व स्वयां न्ह्यः उपराष्ट्रपति परमान्द झां खय् भासं सपथ ग्रहण मयाः धकाः तःगु रिटय् सर्वोच्चं थुलि याकनं फैसला बिल कि उपराष्ट्रपति झा तुरुन्त हे पदच्युत जुइमाःगु तकया अवस्था पिहां वल ।

राष्ट्रपतिया ज्याया बारे सर्वोच्चं बिउगु फैसलायात कयाः माओवादीं आः तक औपचारिक प्रतिक्रिया मबिउनि। माओवादीं राष्ट्रपतिया उगु पलाखं यानाः सरकार त्वःतूगु जक मखु नागरिक सर्वोच्चताया नारा बियाः आन्दोलन हे याःगु खः। लिसें राष्ट्रपतियात बहिष्कार यायेगु ज्या तकं याःगु खः। प्रधानसेनापति बारे तत्कालिन सरकारं गुगु ज्या याःगु खः, उकिया समाधान बरु सर्वोच्चं माले माःगु खः, राष्ट्रपतिं माला बिल, थ्व पाय्छि खः वा मखु, विवाद लिपा थ्यंकं कायम जुइगु निश्चित दु ।

More Stories Like this