समाज सुधारय् मिस नेपाल

नरेन्द्रमान श्रेष्ठ 'गोगंजु'

नकतिनि हे क्वचाःगु 'मिस नेपाल' सुन्दरी कासाय् नेवाः मय्जु सदीक्षा श्रेष्ठ विजयी जूगु दु। वय्कः मय्जु विज्ञान संकायया विद्यार्थी जुयाच्वन। उगु कासाय् वय्कलं 'मिस फोटो जेनिक', 'मिस पर्सनालिटी', 'मिस स्मार्ट', आदिया उपाधी त्याकादीगु खः। सदीक्षा स्वयां न्ह्यः 'मिस नेपाल' जूपिं नेवाः मय्जुपिं झरना बज्राचार्य, निरु श्रेष्ठ, उषा खड्गी, पायल शाक्य आदिपिं खः ।

सुन्दरी कासाया खँ ल्हायेगु खःसा विश्वय् दकलय् न्हापां सुन्दरी कासा सन् १९५१ स शुरु जूगु खःसा नेपालय् सन् १९९४ निसें काठमाडौं जेसिसया ग्वसालय् थज्याःगु कासा न्ह्याःगु खः। थौंकन्हय् मिस वर्ल्ड, मिस एशिया प्यासिफिक, मिस युनिभर्स, मिस वर्ल्ड युनिभरिर्सटी आदि अनेक नामं थज्याःगु कासात जुयाच्वंगु दु। नेपाः दुने 'मिस नेपाल' बाहेक मिस नेवाः, मिस तामाङ, मिस शेर्पा, मिस गुरुङ आदि जातीय सुन्दरी कासात जुयाच्वंगु दु ।

'मिस नेपाल' कासा शुरु जुसांनिसें थुकिया विरोध नं शुरु जूगु खः। थीथी मिसा अधिकारवादीतय्सं 'मिस नेपाल' सुन्दरी कासाया विरोध यानाच्वंगु दु। थुज्वःगु प्रतियोगितां मिसातय्त विज्ञापनया साधन दयेकल धइगु उमिगु तर्क दु। थुकिया लिसें मिसातय्त मनोरञ्जनया साधनकथं कायेगु व इमित शारीरिक व मानसिक रुपं शोषण जुइगु दावी नं विरोधीतय्गु दु। विरोधीतय्सं थज्याःगु तर्क तःसां इमिसं जातीय आधारय् जुइगु सुन्दरी कासाया धाःसा विरोध यानाच्वंगु खनेमदु ।

विरोधीतय्गु तर्कयात खण्डन यासें मिस नेपालया ग्वसाः खलकं धाःसा 'मिस नेपाल' थेंज्याःगु समाजय् मिसातय्गु प्रतिष्ठा व उमिगु आत्मविश्वास थकाइगु कासाया विरोध यायेमाःगु छुं हे आवश्यकता मदु धायेगु यानाच्वंगु दु।
विरोधीतय्सं 'मिस नेपाल' कासाया नकारात्मक खँ हे जक अप्वः ल्हायेगु यानाच्वंगु दुसा ग्वसाः खलकं सकारात्मक खँ जक न्ह्यःने तयेगु यानाच्वंगु दु। समाजया छुं वर्गं धाःसा थुज्वःगु प्रतियोगिताया नकारात्मक पक्षयात चीकाः सकारात्मक पक्षया अनुशरण यानाः थुकिया स्वस्थ, निष्पक्ष व पारदर्शीकथं न्ह्याकेमाःगु खँ न्ह्यथनेगु यानाच्वंगु दु। 'मिस नेपाल' २०१० या प्रायोजक डाबर नेपाल जूगु कारणं यानाः नं सुन्दरी प्रतियोगिता यायेगुया उद्देश्य व्यापार व्यवसायया प्रचार जक खः धाइपिं खने दयाच्वंगु दु। मात्र नां व दां कमे यायेगु माध्यमया रुपय् जक थुगु कासान्ह्यानाच्वंगु खः धइगु इमिगु धापू खः। सुन्दरी कासाया सहभागीतय्सं थुगु ख्यलय् दुहां वइबलय् न्ह्याक्व हे समाजसेवा वा समाज सुधारया ख्यलय् लगे जुइ धकाः धाःसां नं कासा त्याःगुयां छुं र्ई 'सेलिब्रिटी'या रुपय् चर्चाय् वयेगु, इहिपा लिपा थःगु हे गृहस्थी स्वयेगु, फिल्म वा मोडलिङ्गय् दुहां वनेगु वा टेलिभिजन एंकर जुयाः वहे संसारय् तना वनेगु बाहेक राष्ट्र व समाजया निंतिं उमिसं छुं हे ज्या याःगु खने मदु ।

लखौं खर्च यानाः सामाजिक रुपं छुं नं सुधारात्मक ज्या मजूगु सुन्दरी कासा यायेगु स्वयां उकियात देश व समाजया हित जुइगु ज्याय् लगानी यायेमाःगु न्ह्यसः नं वयेगु याः। आः बरु न्हूम्ह मिस नेपाल सदीक्षा श्रेष्ठं गुज्वःगु समाज सुधारया पलाः न्ह्याकी व धाःसा सकस्यां स्वये हे मानिगु विषय जुयाच्वंगु दनि ।

More Stories Like this