सरकार मोहनि न्ह्यः कि लिपा?
मोहनि न्ह्यः हे वइ : एमाले
मोहनि लिपा जक जुइ : कांग्रेस
येँ (सन्ध्या टाइम्स)/प्रधानमन्त्री ल्ययेत जूगु गुंगूगु चरणया चुनाव नं असफल जुइवं आः मोहनि न्ह्यः हे न्हूगु सरकार बने जुइगु सम्भावना म्हो जुया वंगु दु। अथे खःसां सरकार गठनया महत्वपूर्ण घटक जुयाच्वंगु पार्टी एमाले धाःसा मोहनि न्ह्यः हे न्हूगु सरकार गठन यायेगु लागिं लगे जुयाच्वंगु दुसा उकिया अध्यक्ष झलनाथ खनालं नं मोहनि न्ह्यः हे न्हूगु सरकार गठन याये फइगु खँ पिने धायेगु याना हःगु दु ।
तर संसदय् निगूगु तःधंगु पार्टी नेपाली कांग्रेस धाःसा मोहनि न्ह्यः सरकार गठन यायेगु पक्षय् मदुनि। प्रधानमन्त्रीया उम्मेदवार जुयाच्वंम्ह कांग्रेस नेता रामचन्द्र पौडेलं माओवादीं ल्वाभः मत्वःतूतले थम्हं उम्मेदवारी त्वःते मखु धकाः अडान काःगु कारणं यानाः सरकार याकनं गठन जुइगु सम्भावना मदयाच्वंगु खः ।
लिसें गुंगूगु चरणया चुनाव विफल जुइधुंकाः आः झिगूगु चरणया चुनाव मोहनि लिपा जक यायेमाली धकाः नं कांग्रेसं प्रस्ताव तःगु खँ सीदुगु दु। तर संसदं उकियात माने मयासे असोज २० गते हे न्हूगु तिथि घोषणा याःगु दु। तर आःया हे अवस्था कायम जुयाच्वन धाःसा २० गते नं प्रधानमन्त्री ल्यइगु सम्भावना मदुगु खँ सूत्रतय्सं धाःगु दु।
मेखे सहमति कायम जुल धाःसा थः हे प्रधानमन्त्री जुइ धकाः दावी याना च्वनादीम्ह माओवादी अध्यक्ष प्रचण्ड मलेशिया भ्रमणया लागिं थौं पिहां झायेत्यंगु दु। देशय् प्रधानमन्त्री ल्ययेगु लागिं चरणका चरण चुनाव जुयाच्वंगु इलय् वय्कः धाःसा उकियात वास्ता मयासे विदेश भ्रमणय् वनेत्यंगु कारणं नं मोहनि न्ह्यः न्हूम्ह प्रधानमन्त्री वइगु सम्भावना मदुगु खँ थन धयाहःगु दु। भाजु प्रचण्डं मलेशिया भ्रमण लिपा उखें तुं चीन झाइगु ग्वसाः दु। वय्कःया चीन भ्रमण ताःहाकः जुल धाःसा मोहनि झालय् हे वय्कः नेपालय् मदयेफुगु खँ नं धाःगु दु। भाजु प्रचण्डया मलेशिया भ्रमण तकं ग्वःन्हु व गुकथं जुइ धइगु सुनां नं मसिउनि ।
एमाले अध्यक्ष झलनाथ खनालं मोहनि न्ह्यः हे न्हूम्ह प्रधानमन्त्री वइ धकाः पिने धया जूसां एमालेया हे छम्ह केन्द्रीय दुजलं धाःसा उकिया लागिं छुं हे तयारी व आधार धाःसा आः तक मजूनिगु खँ धयादीगु दु ।
