नियमावली संशोधन समाधान मखु

संसदय् न्ह्यानाच्वंगु प्रधानमन्त्री चुनावया दिके हे मफइगु प्रक्रियायात अन्त्य यायेगु लागिं आः थ्व चुनाव सम्बन्धी नियमावलीयात हे संशोधन यायेगु प्रस्ताव न्ह्यःने वःगु दु। बहुमत कयाः प्रधानमन्त्री नियुक्ति मजूतले प्रक्रिया न्ह्याना हे च्वनी धकाः नियमावलीइ च्वयातःगु कारणं आः प्रधानमन्त्री पदया लागिं छम्ह जक उम्मेदवार ल्यनाच्वनं नं चुनाव धाःसा जारी हे जुयाच्वंगु दु। उम्मेदवार जूपिं मेपिंसं नां लित कायेधुंकलं नं चुनाव प्रक्रिया धाःसा दिउगु मखु। उकिं थ्व प्रक्रियायात दिकेगु लागिं नियमावली हे संशोधन यायेगु प्रस्ताव न्ह्यःने तये हःगु खः ।

तर संसदय् थौंकन्हय् चुनावया थ्व गुगु समस्या पिहां वःगु खः, व चुनाव सम्बन्धी नियमावलीया त्रुटिं यानाः पिहां वःगु मखु। थ्व ला चुनाव ल्वाइपिं नेतातय्गु मुर्खतां यानाः पिहां वःगु समस्या खः। सहमतिपाखें प्रधानमन्त्री ल्ययेगु ज्या याःगु जूसा थ्व समस्या पिहां हे वइ मखु। आः वयाच्वंगु समस्या वास्तवय् अकल्पनीय खः। आः नियमावली संशोधन यायेधुंकाः नं थ्व समस्या ज्यनी धाये फइगु अवस्था मदु। थ्वयां लिपा नेतातय्सं हानं मेगु कथंया थथे हे जटिल समस्या पिकया बी। जब थवंथवय् सहमति व विश्वास दइ मखु तब थज्याःगु हे बिचाः मयाना कथंया समस्यात पिहां वइगु खः। उकिं पार्टीया नेतात चुनाव सम्बन्धी नियमावली संशोधन याः जुइगु सिबें नं प्रधानमन्त्री ल्ययेगु ज्यायात चुनाव हे यानाच्वने म्वाःगु लँपुं सम्पन्न यायेगुपाखे लगे जूसा बांलाइ। समस्या नेतातय्गु प्रवृत्ति व सोचय् दुसा चुनाव सम्बन्धी नियमावली संशोधन यानां समाधान लुइके मफइगु खँयात थुइके माली ।

More Stories Like this