अयोध्या विवाद : विवादित भूमि हिन्दुतय्त

भारतया लखनउलय् च्वंगु इलाहाबाद हाई कोर्टं अयोध्याया विवादित भूमियात राम जन्मभूमि घोषणा याःगु दु । हाईकोर्टया बहुमतया फैसलां विवादित भूमियात रामजन्मभूमि घोषणा यासें उकी हिन्दुतय्त अधिकार बीत निर्णय याःगु दु ।

अथे खःसां अदालतं उगु विवादित भूमि वाहेकया जग्गाय् धाःसा बच्छि अधिकार हिन्दु व बच्छि मुस्लमानतय्गु जुइगु निर्णय नं न्यंकूगु दु । सन् १९९२लय् बाबरी मस्जीदयात च्याकाबीवं विवादय् लानाच्वंगु जग्गाय् निगूलिं हिन्दु व मुस्लमान धर्मालम्बीतय्सं थःथःगु धार्मिक स्थल जूगु दावी यानावयाच्वंगु खः ।

सन् १९९२य् मस्जीद च्याकाबीवं जूगु धार्मिक हिंसाय् लानाः २०००म्ह स्वयां अप्व मनूत सीगु खः । बिहीवाः १८दँ लिपा थुकीया बारे इलाहाबाद हाई कोर्टं फैसाला न्यंकूगु खः । फैसाला न्यंकेगु झ्वलय् हानं हिंसा ब्वलनेफइगु हुनिं भारतया दक्वं प्रान्तय् द्वलंद्व सुरक्षाकःमित परिचालन यानातःगु खः ।

थ्वहे दथु्इ भारतीय प्रधानमन्त्री मनमोहन सिंह देशवाशीया निंतिं छगू अपील यानादिसें देय्न्यंक शान्ति व सदभाव कायम यानाः दक्वं धर्म व धार्मिक आस्थाया सम्मान यायेत इनाप यानादीगु दु । उखे भारतीय जनता पार्टीया नेता लालकृष्ण आदवाणी अदालतया फौसाला लिपा छगू पत्रकार सम्मेलन यानादिसें थुगु निर्णययात छगू महत्वपूर्ण निर्णय धासें आः अन भव्य देगः दयेकीगु धयादिल ।

More Stories Like this