कांग्रेसपाखें १० दलया मुँज्या
प्रधानमन्त्रीयात रामचन्द्र पौडेलं नापलात / थौं प्रधानमन्त्रीया गुक्वःगु चुनाव
येँ (सन्ध्या टाइम्स)/व्यवस्थापिका संसदय् प्रधानमन्त्रीया निंतिं गुक्वःगु चुनाव जुइ न्ह्यः हे थौं सुथय् कांग्रेसं वर्तमान कामचलाउ सरकारय् दुथ्याःगु झिगू दलया मंकाः बैठक सःतूगु दु ।
कांग्रेसया संसदीय दलया ज्याकुथी च्वनीगु उगु मुँज्याय् थौं सनिलय् जुइगु प्रधानमन्त्री चुनाव, सरकार संचालन, राजनीतिक गतिरोध अन्त्यया नितिं कांग्रेसं म्हिताच्वंगु भूमिकाया बारे सहलह ब्याकीगु जुइ धाःगु दु ।
थौं सनिलय् संसदय् जुइगु चुनावय् थःपिनिगु पार्टीया नेता रामचन्द्र पौडेलयात मत बियाः प्रधानमन्त्रीइ त्याकाः राजनीतिक गतिरोध अन्त्यया निंतिं माःगु कथं भूमिका म्हितादीत सरकारवादी दलया नेतातय्त कांग्रेसया नेतातय्सं इनाप याइगु खँ छम्ह नेतां धयादीगु दु ।
माओवादी उम्मेदवार प्रचण्डं नां लित कायेधुंकूगु अवस्थाय् चुनावी प्रक्रिया त्वःते मजिउगु नापं मेगु विकल्पया रुपय् न्हापां सहमति जुल धाःसा जक थःपिंसं उम्मेदवारी लित कायेगु जुइ धकाः माओवादी व एमालेया नेतातय्त धायेधुनागु खँ नं झिगू दलया नेतातय्त कनी धाःगु दु ।
थौं जुइगु प्रधानमन्त्रीया गुक्वःगु चुनावय् नेपाली कांग्रेसया नेता पौडेल छम्ह जक उम्मेदवार जुयाच्वंगु दु। वय्कः छम्ह जक उम्मेदवार जुयादीगु जूसां एकीकृत माओवादी व एमालेपाखें बहिस्कार यायेवं नेता पौडेल गुगु नं कथं प्रधानमन्त्री पदय् त्याइगु अवस्था मदु। थौंया चुनावय् नं च्याक्वःगु चुनावय् थें हे माओवादी, एमाले नापं संसदया बहुमत दलया बहुमत सिबें अप्वः सभासद्तय्सं बहिस्कार याइगु जूगु दु ।
थ्व हे झ्वलय् प्रधानमन्त्रीया छम्ह जक उम्मेदवार नापं नेपाली कांग्रेसया नेता रामचन्द्र पौडेलं थौं सुथय् प्रधानमन्त्री माधवकुमार नेपालयात नापलानाः सहलह ब्याकादीगु दु। सहलहया झ्वलय् राजनीतिक गतिरोध अन्त्य यायेगु नापं प्रधानमन्त्रीया चुनाव बारे नं खँ जूगु खः ।
नेता पौडेलं एकीकृत माओवादीं शान्ति प्रक्रिया व लोकतान्त्रिक संविधान दयेकेगु ग्यारेन्ट यात धाःसा थःम्हं प्रधानमन्त्रीया उम्मेदवारी लित कायेगु जुइ धकाः प्रधानमन्त्री नेपालयात धयादीगु खः। कांग्रेसं तयार याःगु अवधारणाया बारे नं प्रधानमन्त्री नेपालयात कनेगु ज्या पौडेलं यानादीगु खः ।
लोकतान्त्रिक संविधान, सेना समायोजन, कब्जा यानातःगु सम्पत्ति लित बीगु, उम्मेदवारी लित कायेगु नापं मेमेगु विषयय् प्याकेजं हे सहमति यायेमाः धकाः कांग्रेसं धया वयाच्वंगु दु। कांग्रेसं प्याकेजं हे समाधान मालेगु धाःगु खँय् माओवादी धाःसा सहमत जुयाच्वंगु मदु ।
