सेनायात छाय् कांग्रेसं साथ बियाच्वन

नेपाली सेनाया प्रधानसेनापति रुक्मांगत कटवालयात चीकेगु लागिं सरकारं ल्ह्वंगु पलाःयात कयाः देय्या पूरा राजनीतिक ख्यः हे निगू ध्रुवय् विभाजित जूगु दु । थुकी छगू पुचलं नेपाली सेनां नागरिक सर्वोच्चतायात हाथ्या बिउगु कारणं वयात चीके हे माः धयाच्वंगु दुसा मेगु पुचलं धाःसा नेपाली सेना देय्या दकलय् संवेदनशील अंग जूगु कारणं वयात हायेकेगु वा थीगु ज्या याये मजिउ धयाच्वंगु दु । निगुलिं बिचाःलय् थःथःगु कडा तर्क दुगु कारणं निगुलिंयात नकारे याये फइगु अवस्था आः थथेंयात मदुनि ।

थ्व झ्वलय् देय्या दकलय् तःधंगु प्रजातान्त्रिक धाःगु पार्टी नेपाली कांग्रेसं छाय् सेना थेंज्याःगु निकाययात साथ बियाच्वन खः व धाःसा बिचाः यायेबहःगु विषय जुयाच्वंगु दु । राजनीतिक पार्टीत जानाः गठन यानातःगु सरकार व न्हापांनिसें जुजुया तावेदारी याना वयाच्वंगु सेनाया दथुइ ब्वलंगु थ्व तनावया इलय् कांग्रेसं छाय् राजनीतिक पार्टीया नागरिक सरकारयात साथ मबिसे जुजुया भक्ति याइगु सेनायात साथ बियाच्वन कांग्रेसया बुद्धिजीवीतय्सं थ्व बारे बिउगु बिचाः नं मनन यायेबहः हे जू । नेपाली सेना धइगु नं गुगुं बः कायेबहःगु निकाय अवश्य नं मखु । थ्वं न्हापांनिसें जुजुयात ग्वाहालि याना वयाच्वंगु कारणं थ्व नं छगू कथंया अधिनायकवादी सोचं हे न्ह्यानाच्वंगु निकाय खः । पाय्छि उकथं हे नेकपा माओवादी नं छगू अधिनायकवादी राजनीतिक पार्टी खः । कन्हय् वनाः थ्व निगू अधिनायकवादी शक्तितय् तालमेल नं जुइफु । छगू इलय् माओवादी व जुजुया दथुइ तालमेल जुइगु अवस्था तक थ्यंगु हे खः । छुं जुयाः सेना व माओवादी दथुइ धाथें तालमेल जुल व थुिपं मिले जुल धाःसा थुिपं निगू शक्ति जानाः मेमेगु राजनीतिक पार्टीतय्त सखाप हे याइगु सम्भावना नं मदुगु मखु ।

उकिं थ्व निगू अधिनायकवादी शक्तितय्त थवंथः ल्वाका तये फतले मेमेगु राजनीतिक पार्टीतय्त फाइदा हे जुइ । उमित अथे ल्वाका तयेगु लािगं हे कांग्रेसं सेनाया प लिनाः ग्वाकाच्वंगु जुइफु । आः न्ह्यसः वइ कांग्रेसं निगू अधिनायकवादी शक्ति मध्यय् माओवादीयात त्वःताः छाय् सेनायात साथ बिल थ्व नं स्पष्ट दु । माओवादी छगू राजनीतिक पार्टी जूगु कारणं कन्हय् थ्वयालिसे कांग्रेसया प्रतिस्पर्धा जुइ तिनि । अज्याःगु प्रतिस्पर्धाय् माओवादीयात पराजित यायेगु हे वयागु रणनीति जुइ । तर नेपाली सेना कांग्रेसया प्रतिस्पर्धी मखु । सेनालिसे ल्वायेगु धकाः थ्वयात नष्ट हे यायेगु ज्या नं याये फइ मखु । सेना ला कन्हय् नं माली हे तिनि । सेना मदुगु नेपाःया परिकल्पना याये फइ मखु । तर माओवादी मदुगु नेपाःया
कल्पना धाःसा याये फइ । माओवादी मदुसां नेपाःयात छुं जुइ मखु तर सेना मंत धाःसा तसकं हे पाइ । कन्हय् देशय् कांग्रेसया सरकार वल हे धाःसां वं ज्या कायेमाःगु ला सेनापाखें खः माओवादीपाखें मखु ।

आः सेनायात कांग्रेसं साथ बीगु धइगु कन्हय् सेनायात लोकतान्त्रीकरण यायेगु ज्याया हे छगू प्रकि्रया नं खः । थौं कांग्रेसलिसे भ्यलेपुन धाःसा कन्हय् सेना नं लोकतान्त्रिक चरित्रय् समाहित जुयावनेत अःपुइ । म्हिगः जुजुलिसे च्वनाच्वंगु कारणं सेनाया चरित्र 'दरवारिया' जुयाच्वन । आः कांग्रेसलिसे च्वन धाःसा प्रजातान्त्रिक जुइगु व प्रजातान्त्रिक मान्यता नं थुया वइ धइगु कांग्रेस बुद्धिजीवीतय् बिचाः खः ।

More Stories Like this