मतदाता म्हसीका व नागरिकताया विवाद

निर्वाचन आयोगं थौंकन्हय् कायेगु यानाच्वंगु पूर्ण परिचय सहितया मतदाता म्हसीका पौ दयेकेगु ज्यायात मधेशवादी पार्टीतय्सं अवरोध पिकयाहःगु दु। आयोगं थ्व ज्या नागरिकताया आधारय् यायेगु धकाः मापदण्ड दयेकूगु कारणं मधेशवादी दलतय्सं थ्व पंगः थनेगु ज्या याःगु खः। मधेश लागाय् नागरिकता अझ नं विवादया विषय जुयाच्वंगु दनि। अन खास यानाः सीमावर्ती लागा भारतया मनूतय्सं तकं वयाः नागरिकता काये फइगु खँयात ध्यानय् तयाः नागरिकता वितरणय् कडाई यानातःगु खःसा थुकिं यानाः स्थानीय नेपाःमि जनता नं प्रभावित जुयाच्वंगु दु। उकिं तराईया नागरिकता समस्या समाधान यायेमाःगु थौंया अतिकं हथाय्गु ज्या जुयाच्वंगु दु। तर मतदाता म्हसीका पौ दयेकेगु ज्यायात नागरिकताया खँ ल्हानाः पंगः थनेगु पाय्छि मखु। नागरिकता नेपाःमिया म्हसीका खःसा चुनावय् नेपाःमिं हे जक भोट कुर्के खनेमाः धइगु मान्यता खः। उकिं आयोगं नागरिकतायात आधार दयेकूगु खँयात कुंखिनेथाय् मदु। नागरिकता समस्यायात गय् यानाः समाधान यायेगु खः व सरकार वा संसदया ज्या खः। मधेशवादी पार्टीतय्सं थ्व खँ सरकार समक्ष वा संसद दुने ल्ह्वनेमाः। तरथौंकन्हय् मधेशवादी पार्टीत थःगु लागाया थज्याःगु समस्यात समाधान यायेगु स्वयां नं सरकार गठनया ज्याय् ल्यांथ्यां जुयाः मनोरंजन कयाच्वंगु दु। मधेशवादी दलतय्सं नागरिकता वितरणय् सुं नं विदेशी दुहां वइ मखु धइगु ग्यारेन्टी बियाः ज्या न्ह्याकल धाःसा थुकियात सुनां नं पंगः थनी मखु। उकिं नागरिकताया समस्यायात समाधान यायां वनेगु शर्तय् मतदाता म्हसीका पौ दयेकेगु ज्यायात निरन्तरता बीकेमाः ।

More Stories Like this