प्यदँ लिपा हाकनं ख्वपय् न्यकू बाजं पिदन
ख्वप (सन्ध्या टाइम्स)/ख्वपया मानन्धर समुदायं थःपिनि मौलिक बाजं कथं कयातःगु न्यकू बाजं प्यदँ लिपा हाकनं थुगुसी पिदंगु दु। आपालं खर्च मालीगु जुयाः दँय्दसं पिथने मफुसां निदँ प्यदँ पाकाः थ्व बाजं गुंला लछिया लागिं पिदनेगु यानाच्वंगु दु। थुगुसी छुं दिं तक पुलांपिं हे कलाकारतय्त रफत यानाः वंगु श्रावण २६ गते पारुनिसें थ्व बाजं पिथंगु खः। न्हापांगु न्हि कुन्हु छ्वास अजिमा धाइम्ह अनन्त लोकेश्वरथाय् तक वनाः ख्वप देय् चाःहिउगु खः ।
ख्वपय् नं तसकं दुर्लभ जुइधुंकूगु थुगु बाजं थ्वयां न्ह्यः साकुलान मानन्धर परिवारपाखें २०६२ सालय् छक्वः पिकाःगु खः। २०५७ सालंनिसें आः तक स्वक्वः थुगु बाजं पिथंगु व सलंसः परिवारया लखौं तका दां फुइगु जुयाः थ्व बाजं दँय्दसं पिथने मफयाच्वंगु खँ ३ वडाया पुलांम्ह वडा अध्यक्ष समाजसेवी विष्णुबहादुर मानन्धरं सन्ध्या टाइम्सयात कनादिल। छुं ई तक शाक्य बज्राचार्य समुदाय दुने नं कायम जूगु न्यकू बाजं आः सीमित जूवंगु दु ।
