राजोपाध्याय समाजं थीथी व्यक्तित्वपिन्त हन

राजोपाध्याय् समाजं छगु ज्याझ्वःया दथुइ थीथी ख्यलय् योगदान ब्यूपिन्त हन। पत्रकारीता, संगीत व कासाख्यलय् योगदानब्यूपि संचारकमि सिल्भिया राजोपाध्याय, सरोदबादक सुदर्शन राजोपाध्याय् व पूर्व चेस कासामि विजय शर्मा राजोपाध्याययात हंगु खः । यलय् जुगु ज्याझ्वलय् मूपाहां महिला, बालबालिका तथा समाज कल्याण मन्त्रि ऋृदिबाबा प्रधानं वय्‌कःपिन्त हनादीगु खः।

ज्याझ्वलय् थगुने एस एल सी जाँचय् ताःलाःपिन्त राजोपाध्याय समाजया झिंच्याम्ह ब्वमिपिलिसें समाजं छु ई न्हय् न्हयाकूगु उदघोषण तालिमय् ब्वतिकाःपिं नीस्वम्हसित न हनापौ लिसें दसिपौ लल्हागु खः। समाजया नाय् वदन ज्वालानन्द राजोपाध्याय्या नायस्वीइ न्हयागु ज्याझवलय् स्यस्यः समाज यलया नाय् डा केदार लाल श्रेष्ठ, ताम्राकार समाजया नाय् रविन्द्र राज ताम्रकार, उपाकर्म गुठी व्यवस्थापन समितिया नाय् धु्रव ज्वालानन्द राजोपाध्याय, वैदिक प्रतिस्थानया नाय् बलदेव जुजु, अग्निशाला व्यवस्थापन समितिया न्वकु निगेन्द्र राज राजोपाध्याय्ं नवानादिगु खः।

यल जिल्लाया प्रमुख जिल्ला अधिकारी शशि शेखर श्रेष्ठया उपस्थितिइ न्हयागु ज्याझवलय् समाजया महासचिव संजय शर्मा राजोपाध्यायं लसकुस न्वचु, कार्यसमिति दुज भुषण नाथ शर्मा सुभाय् देछानादिगु खःसा उदघोषण तालिमया प्रशिक्षार्थीत प्रयास राजोपाध्याय् व कृपा शर्मां ज्याझ्वः न्हयाकादीगु खः।