नेपाः राष्ट्रिय पार्टी स्थापना दिवसया लसताय् थौं तःबहालय् ज्याझ्वः
नेपाः राष्ट्रिय पार्टीया स्वक्वःगु स्थापना दिवसया लसताय् थौं यलया तःबहालय् छगू ज्याझ्वः यात ।
उगु ज्याझ्वलय् मूपाहां नापं नेपाः राष्ट्रिय पार्टीया नायः डा. केशवमान शाक्यं नेवाःत थःगु हक अधिकारया लागि सतकय् वयेगु कथं थुगु ज्याझ्वः यानागु धयादिसें नेपालय् शाही शासनकाल, राणा शासन, पंचायती शासनय् जक मखु ०४६ सालया बहुदलीय शासन लिपा ०६२/६३ या जनआन्दोलन लिपा गणतन्त्र वयेधुंकाः नं नेवाःतय्त क्वत्यलेगु ज्या जक जूगु व थःगु पार्टीया मनूत स्वनिगलय् केन्द्रीत यायेगु ज्या जक जूगु खँ धयादिल । थुकिया लागि नेवाःत थःगु हक अधिकारया लागि न्ह्यज्यायेमाःगु बः बियादिसें थःगु थासय् थःम्हेस्यां शासन यायेगु खःसा नेवाःतय्सं नं राजनीति यायेमाःगु खँ धयादिल ।
ज्याझ्वलय् एकिकृत नेकपा माओवादीया पोलिटब्यूरो दुजः नापं सभासद हिसिला यिमं राजनैतिक पार्टी व जातीय पार्टीत नापं जानाः सतक, सदन व सरकारय् संघर्ष याःसा जक संघीयता सुनिश्चित यायेफइगु खँ धयादिल ।
अथेहे संघीय लोकतान्त्रिक राष्ट्रिय मंचया नायः खगेन्द्र माखि्रनं थःगु भूमि प्राप्तिया लागि लिम्बुवान व खम्वुवानया आन्दोलन न्ह्याकाच्वनागु खँ कनादिसें जातिया ऐतिहासिक पृष्ठभूमिया लिधंसाय् संघीयता जुइमाःगु खँ कनादिल ।
नेपाः राष्ट्रिय पार्टीया न्वकू नरेशवीर शाक्यं ज्याझ्वलय् लसकुस यानादिसें नेवाःतय्गु हक अधिकारया लागि पार्टीं सः तयावयाच्वंगु व नेवाःतय्गु अस्तित्व स्व-पहिचानया लागि निर्णायक थासय् थ्यंकेमाःगु खँ कनादिसें सरकारं थी थी योजना हयाः नेवाःतय्त स्वनिगःपाखें विस्थापित यायेत स्वयाच्वंगु धयादिल ।
ज्याझ्वलय् नेपाली कांग्रेसया सभासद तीर्थराम डंगोल, ताम्सालिङ राष्ट्रिय दलया नायः परशुराम तामाङ, नेपाल लोकतान्त्रिक नेवाः संघया न्वकू हरिकृष्ण व्यंजनकार, पुलांम्ह मन्त्री बुद्धिराज बज्राचार्य, समाजसेवी मोतिलाल शिल्पकार, लक्ष्मीदास मानन्धर, ज्यापु समाजया नायः रामकाजी अवाल लगायत ब्यक्तिपिंस नेपाः राष्ट्रिय पार्टी स्थापना दिवसया लसताय् नेवाःतय्गु हक हित व संघीयता सुनिश्चितताया लागि न्ह्याःवने फयेमा धकाः भिन्तुना देछानादिल ।
नेपाः राष्ट्रिय पार्टीया दांभरि सुरेश प्रधानया सभाध्यक्षय् जूगु उगु ज्याझ्वलय् नेपाः राष्ट्रिय पार्टीया छम्ह जक सभासद बुद्ध साय्मिया नं उपस्थिति दुगु खः ।
