नेवाः छप्पँ जुयाः राज्ययात चेतावनी
यल (सन्ध्या टाइम्स)/नेवाः स्वायत्त राज्य मंकाः संघर्ष समितिया ग्वसालय् म्हिगः यलया पूच्वय् नेवाः एकता दिवस हनेगु ज्या जुल ।
संघर्ष समितिया वर्तमान नायः सानुराजा शाक्यया सभापतित्वय् जूगु उगु ज्याझ्वलय् न्ववासें संघर्ष समिति सचिवालयया सचिव मल्ल के. सुन्दरं नेवाःतय्सं थौं थःपिनि स्वायत्त शासन माग यानाच्वंगु धइगु अथें मखु, थ्व अन्तर्राष्ट्रिय श्रम संगठनया सन्धि १६९ कथं नं प्राप्त जुइगु अधिकार खः धासें यदि इलय् संविधान पिहां मवल धाःसा उकिया लिच्वः बांलाइ मखु धकाः ६०१ म्ह सभासद्तय्त चेतावनी बीत नं थौंया ज्याझ्वः यानागु खः धयादिल ।
संघर्ष समितिया छगू घटक नेवाः देय्गुथि नेपालमण्डलया नायः नरेन्द्रभक्त हाडां थौंया ज्याझ्वः नेवाःतय् रहरं हनाच्वंगु मखु, आन्दोलन कथं हनाच्वनागु खः धासें नागरिकताय् नेवाःतय् भाय्यात नेपालभाषा धकाः च्वयेमाः धयादिल ।
नेवाः जागरण मञ्चया नायः सुजीव वज्राचार्यं संघर्ष समितिया हस्तक्षेपकारी ज्याझ्वः न्ह्यब्वसें स्वनिगःया फुक्कं नगरपालिकाया कर्मचारी रैथाने नेवाः जुइमाः धकाः माग यानादिल ।
लोकतान्त्रिक नेवाः दबूया कार्यवाहक नायः नियम सिंहं बोडे घोषणा पत्र ब्वनाः न्यंकुसें उगु घोषणापत्र प्रति सकलें नेवाः व नेवाः खलः पुचःत प्रतिवद्ध दु धयादिल।
संघर्ष समितिया सल्लाहकार प्रा. प्रेमशान्ति तुलाधरं नेवाःतय् दथुइ कायम जुयाच्वंगु जातीय व लैंगिक विभेदयात समेत चीकेगु लागिं कुतः यायेमाः धासें थौं नेवाःत राजनीतिक रुपं नं सचेत जुया वःगु खँ कुलादिल।
नेवाः ल्याय्म्ह न्ह्यलुवाया नायः नरेशवीर शाक्यं संघर्ष समितिपाखें सरकारयात लःल्हाःगु स्मरणपत्र ब्वनाः न्यंकुसें बियातःगु ईया दुने हे न्हूगु संविधान जारी यायेत इनाप यानादिल ।
ज्यापु महागुथिया महासचिव राजभाई जकःमिं सुभाय् देछासें ज्यापुतय्त तःसिंनं बिउगु दुःख, क्वजात धाःपिंत थजात धाःपिंसं बिउगु दुःख ल्वःमंकाः थौं नेवाःत छप्पँ जूवःगु दु धासें यदि नेवाःतय् थ्व एकतायात राज्यं वेवास्ता यात धाःसा ज्यापुतय्सं राज्ययात सांस्कृतिक बहिष्कार यानाः सिंहदरवार घेरे याइ धयादिल ।
म्हिगःया सभा न्ह्यः छगू जुलुस पिकयाः बुंगद्यः सालीगु रुट लाकाः चाःहिउगु खः ।
