नेवाः एकता दिवसया नितिं अन्तिम तयारी
थौं भाषिक कार्यकर्तातय्गु भेला, नेवाः मोर्चाया नं भेला
येँ (सन्ध्या टाइम्स)/वइगु विहिवाः पोहेलाथ्व नवमि पुस २९ गते यलय् तःजिक नेवाः एकता दिवस हनेगु नितिं अन्तिम तयारी जुयाच्वंगु दु ।
नेवाः स्वायत्त राज्य जनस्तरं घोषणा जूगु दिंयात लुमंकाः नेवाः एकता दिवस हनेगु तयारी यानाच्वंगु खः। दिवस तःजिक हनेगु नितिं थौं नेवाः स्वायत्त राज्य मंकाः संघर्ष समितिं येँया नेपालभाषाया कार्यकर्तातय्गु तःजिक भेला याइगु जूगु दु ।
अथे हे एकीकृत नेवाः राष्ट्रिय मुक्ति मोर्चां नं स्वनिगःया कार्यकर्तातय्गु तःजिगु भेला याइगु जूगु दु। वइगु विहिवाः नेवाः एकता दिवसया झ्वलय् सांस्कृतिक झाँकी नापं यलया पूच्वं जुलुस न्ह्याके न्ह्यः जुइगु सभाय् संविधानसभायात स्मरण पौ बीगु, नेवाः स्वायत्त राज्यया अवधारणा कथं स्थानीय निकायसं अभ्यास यायेगु ज्या केन्द्रीकृत कथं किपू नगरपालिकाय् छ्यलाः वनेगु घोषणा याइ धाःगु दु ।
आत्मनिर्णयया अधिकार नापं अग्राधिकार सहितया नेवाः स्वायत्त
राज्यया सुनिश्चित यायेमाःगु नापं इलय् हे संविधान घोषणा यायेमाःगु चेतावनी नापं संविधानसभायात उगु स्मरण पौ बीत्यंगु खः ।
अथे हे नकतिनि क्वचाःगु नेवाः राष्ट्रिय राजनीतिक सम्मेलं नेवाः दुने जातपातया विभेद मदु धकाः घोषणा याःगुयात जातीय खलः पुचःतपाखें मंकाः कथं सार्वजनिक रुपं हे अनुमोदन यायेगु, नेवाः राजनीतिक सम्मेलनं घोषणा याःगु स्थानीय निकायसं हस्तक्षेपकारी भूमिका म्हितेगु धकाः घोषणा याःगुयात नं अनुमोदन यायेगु ज्याझ्वः तयातःगु खँ सीदुगु दु ।
