थनिंनिसें 'विराट नेवाः महोत्सव'

झी पुचः, विराटनगरया ग्वसालय् थनिंनिसें 'विराट नेवाः महोत्सव' याःगु दु । स्थानीय होटल नमस्कारय् याःगु महोत्सव स्वन्हु तक न्ह्याइगु खः ।

उपप्रधानमन्त्री माननीय विजयकुमार गच्छेदारं थौं उगु महोत्सवया उलेज्या यानादीगु खः । नेवाः भाय् विश्वय् हे उत्कृष्ट भाय् मध्ये छगू खः धयादिसें उपप्रधानमन्त्री गच्छेदारं नेवाःतय्सं हे थ्व भाय् मल्हाना हःगु खँय् दुःख प्वंकादिल । नेवाः भाय् व तजिलजि म्वाका: तयेमाःगु खँय् बः वियादिसें थुगु महोत्सव सुथांलायेमा धकाः कामना यानादिल । झी पुचः विराटनगरया नायः राजन श्रेष्ठया सभापतित्वय् जूगु उलेज्या ज्याझ्वलय् आपालं मनूतय्गु ब्वति दुगु खः ।

महोत्वस ताःलाकेत येँय् नं ३० म्हेसिया छगू टोलि म्हीग हे उखे वंगु खः । आःखाःछेँया प्रमुख भाजु गणेशराम लाछिजुया नेतृत्वय् वंगु उगु टोलिं अन नेवाः तजिलजिया जीवन्त झाँकित न्ह्यब्वइगु खः ।

नेवाः नसाः स्टल, साँस्कृतिक ज्याझ्वःलिसें कंस न्यासः मनूतय्त नेवाः भ्वय् नं नकीगु ज्याझ्वः दुगु खँ भाजु गणेशराम लाछिजुं नेपालमण्डल डटकमयात कनादिल ।