विराटनगरय् नेवाः महोत्सब यायेगु तयारी
विराटनगर (झीगु स्वनिगः)
विराटनगरय् पुस २३ गतेनिसें न्ह्याइगु नेवाः महोत्सबया तयारी लिपांगु चरणय् थ्यंगु ग्वसाः खलः झी पुचलं जानकारी ब्यूगु दु । विराटनगरय् निक्वःगु खुसिइ जुइत्यंगु महोत्सबय् नेवाः जातिया म्हसीकायात न्ह्यःब्वयेगु नितिं थीथी नीखुगू स्टलत तइगु झी पुचः विराटनगरया नायः राजन श्रेष्ठं जानकारी बियादीगु दु ।
विराटनगर ट्राफिक चोकसं च्वंगु होटल नमस्कारया ल्यूने जुइगु महोत्सबय् नीगू नसा लिसे खाद्यबस्तुया स्टकल व चाया बसाःज्वलं, गुन्द्री, लासा लगायतया खुगू उत्पादनमुलक ज्वलंया स्टल दइगु ग्वसाः खलकं जानकारी ब्यूगु दु । पुस २५ गतेतक्क न्ह्याइगु महोत्सबय् निसः दँ पुलांगु नेपाःया मौलिक बाजात नं प्रदर्शनय् तइगु जूगु दु । थःगु जातिया म्हसीकायात ल्यंकाः तयेगुया लिसलिसे युवातय्त उकियाबारे सचेत यायेगु नितिं महोत्सब ग्वसाः ग्वयेत्यनागु नायः श्रेष्ठं धयादीगु दु । महोत्सबय् तयातःगु बस्तुत गुणस्तरीय जुइगुया लिसलिसे दंक भावं गाहाकिपिंसं न्यायेफइगु ग्वसाः खलकं जानकारी ब्यूगु दु । महोत्सबं पर्यटन दँ २०११ यात नापं ग्वाहालि याइगु झी पुचःया छ्याञ्जे भविषकुमार श्रेष्ठं जानकारी बियादीगु दु ।
