एकीकृत नेवाः मोर्चाया संरक्षक माणिकलाल
येँ (सन्ध्या टाइम्स)/नेवा राष्ट्रिय मुक्ति मोर्चा व नेवाः मुक्ति मंकाः दबू दथुइ म्हिगः जूगु एकता अधिवेशन लिपा न्हू नीस्वंगु 'एकीकृत नेवाः राष्ट्रिय मुक्ति मोर्चा'या संरक्षकय् प्रा. माणिकलाल श्रेष्ठ च्वनादीगु दु। येँय् जूगु उगु एकता अधिवेशनं नेवाः मुक्ति मंकाः दबूया नायः दिलबहादुर श्रेष्ठयात हे एकीकृत नेवाः मोर्चाया नं नायः ल्यःगु दु ।
तत्कालिन माओवादीया नेवाः राष्ट्रिय मुक्ति मोर्चा व तत्कालिन जनमोर्चाया नेवाः मुक्ति मंकाः दबू एकीकृत यायेधुंकाः आः 'एकीकृत नेवाः राष्ट्रिय मुक्ति मोर्चा' धायेगु खँ नं क्वःछिउगु खः। एकीकृत नेवाः मोर्चाया न्वकु पदय् हिसिला यमि, दिलीप महर्जन, बसन्त श्रेष्ठ व गोपीकृष्ण श्रेष्ठयात ल्यःगु दु। अथे हे महाचिवय् पवनमान श्रेष्ठ, सचिवय् वदन शर्मा व सुरेश श्रेष्ठ नापं दांभरीइ शिव श्रेष्ठयात ल्यःगु दु ।
५१ म्हेसिया केन्द्रीय सचिवालय् दयेकूगु उगु मोर्चाया केन्द्रीय दुजःपिं १४५ म्ह ल्यःगु दु। एकता महाधिवेशनं हितमान शाक्यया नेतृत्वय् सल्लाहकार परिषद् नं नीस्वंगु दु। उगु परिषद्या सचिव सवरत्तम डंगोल खः। उगु एकता अधिवेशनं वइगु फागुन १३, १४ व १५ गते राष्ट्रिय सम्मेलन यायगु निर्णय नं याःगु दु ।
मंकाः संघर्ष समितिइ गुंगू जक घटक
नेवाः राष्ट्रिय मुक्ति मोर्चा व नेवाः मुक्ति मंकाः दबू छगू हे जुयाः 'एकीकृत नेवाः मोर्चा' जूगुलिं आः नेवाः स्वायत्त राज्य मंकाः संघर्ष समितिइ गुंगू जक घटक जूवंगु दु। तत्कालिन माओवादी व जनमोर्चा एकता जुयाः 'एकीकृत माओवादी' जुइधुंकाः निगुलिं पार्टीया नेवाः फाँट नेवाः मोर्चा व नेवाः मुक्ति मंकाः दबू नं एकता जूगु खः। थ्व धुंकाः आः मंकाः संघर्ष समितिइ एकीकत नेवाः राष्ट्रिय मुक्ति मोर्चां जक प्रतिनिधित्व याइगु जूगु दु ।
