मगराँत स्वायत्त प्रदेशया घोषणा

पाल्पा (झीगु स्वनिगः)

पाल्पाया तानसेन टुडिखेलपाखें म्हिगः नेपाल मगर संघं मगराँत स्वायत्त प्रदेशया घोषणा याःगु दु । संघया केन्द्रीय नायः झकबहादुर थापामगरं म्हिगः याःगु घोषणासभा ज्याझ्वःया माचपाखें मगराँत स्वायत्त प्रदेशया घोषणा यानादीगु खः । म्हिगः घोषणा याःगु मगराँत स्वायत्त प्रदेशय् झिच्यागू जिल्लाया भूभाग कःघाःगु दु । मगराँत घोषणासभाय् मगराँतया झिच्यागू जिल्ला कःघाःगु भूभाग लिसेया नक्साङ्कन नापं सार्वजनिक याःगु दु । मगराँत घोषणासभा ज्याझ्वःया प्रमुख वक्तायारुपं न्वंवानादिसें एकीकृत नेकपा माओवादीया मू छ्यान्जे रामबहादुर थापा बादलं आः संविधान दयेकी वा मदयेकी धइगु अनिश्चित जूगु न्ह्यथनादिसें नेता बादलं थुगु इलय् फुक्कसिनं संकल्प यायेमाःगु धयादीगु खः । जातीय वर्गीय क्षेत्रीय लिङ्गीय मुक्ति आन्दोलनयात निरन्तरता बीमाःगु खँय् बहः बियादिसें नेता बादलं थुपि संकल्पयात अझ धिसिलाके माःगु न्ह्यथनादिल ।

राज्यया फुक्क ह्वःतालय् नं जनसंख्याया आधारय् समानुपातिक अधिकार बिइमाःगु धयादिल । वय्कलं मगर जातिया आत्मनिर्णयया अधिकार निर्विकल्प जुइमाःगु धयादिल । नेता बादलं आत्मनिर्णयया अधिकारय् विशेष बहः बियादिसें मगराँत स्वायत्त राज्यया नं विकल्प मदुगु धयादिल । माओवादी नेता बादलं आत्मनिर्णयया अधिकार न्हूगु दयेकीगु संविधानय् न्ह्यःथनेमाःगु धयादिल । आत्मनिर्णयया अधिकार दइमखुसा व फुक्क छलकपट खः बादलया धापू खः ।