पिने जिल्लाया प्रतिनिधितय्त लसकुस
येँ (सन्ध्या टाइम्स)/नेवाः राष्ट्रिय राजनीतिक सम्मेलनय् ब्वति कायेत येँय् वयाच्वंपिं पिने जिल्लाया प्रतिनिधितय्त म्हीग नेवाः देय् दबूपाखें थःगु ज्याकू ताम्सिपाखाय् छगू ज्याझ्वः यासें लसकुस यात। ज्याझ्वलय् सभापतिया थासं न्ववानादिसें नेवाः देय् दबूया नायः नरेश ताम्रकारं आः नं नेवाःतय्त नेवाः राज्य मबिसें षडयन्त्र हे यानाच्वन धाःसा देशव्यापी रुपं दनेधुंकूपिं झी नेवाःत आः ल्हातय् धौ फिनाः मौन जुया च्वनी मखु धयादिल ।
नेवाः देय् दबूया संरक्षक मल्ल के. सुन्दरं नेवाः सम्मेलनं देय् न्यंकंया नेवाःतय्त छप्पँ जुयाः न्ह्याः वनेगु निंतिं बांलाःगु सन्देश बिउगु खँ कनादिल ।
ज्याझ्वलय् देय् दबूया मेम्ह संरक्षक लक्ष्मण राजवंशी, नेवाः स्वायत्त राज्य मंकाः संघर्ष समितिया नायः नरेन्द्रभक्त हाडा नापं थीथी वक्तातय्सं नेवाः प्रदेश दुने पिनेया नेवाःतय् अधिकारया बारे माल धाःसा हानं छक्वः विशेष हे मुँज्या यानाः लिच्वः पिकायेगु खँ कनादीगु खः। ज्याझ्वलय् नेवाः प्रदेशं पिने लाइगु जिल्लां वयाच्वंपिं नेवाः प्रतिनिधितय्सं संघीय व्यवस्थाय् पिनेया नेवाःतय् अधिकार गय् यानाः सुरक्षित जुइ धइगु खँय् स्पष्ट लिसः वयेमाःगु बिचाः प्वंकूगु खः ।
मेखे म्हीग हे नेपाः राष्ट्रिय पार्टीपाखें नं पिने जिल्लां वयाच्वंपिं प्रतिनिधिपिनि हनाय् थनया होटल आनन्द गणबहालय् बहनी लसकुस यासें नेवाः भ्वय्या ग्वसाः ग्वःगु खः। ज्याझ्वलय् नेपाः पार्टीया पदाधिकारीतय्सं पार्टीया अवधारणा बारे कनादीगु खः ।
