प्यंगू बुँदे 'बोडे घोषणापत्र' जारी यासें सम्मेलन क्वचाल
नेवाः स्वायत्त राज्य मंकाः संघर्ष समितिया ग्वसालय् ख्वपया मध्यपुर थिमि नगरपालिकाया बोडेय् जूगु निन्हुयंया नेवाः राष्ट्रिय राजनीतिक सम्मेलन प्यंगू बुँदे घोषणापत्र जारी यासें क्वचाःगु दु ।
सम्मेलनं स्वायत्तता व स्वशासनया मान्यता कथं आत्मनिर्णयया अधिकार व आदिवासी अग्राधिकार सहितया नेवाः राज्यया सुनिश्चितताया लिसेलिसें न्हूगु संविधान इलय् हे च्वयेमाःगु खँय् बः ब्यूगु दु ।
अथेहे संविधानसभाया राज्य पुनर्सरचना समितिं प्रस्तावित याःगु नेवाः प्रदेशया लागा चीकूगु धासें सम्भाब्यताया लिधंसाय् अझ तःकू व तब्या यायेमाःगु प्रस्तावित नेवाः राज्यया पिने च्वंपिं नेवाःतय्गु हकहित व अधिकारया नापं नेवाः राज्यय् समानुपातिक प्रतिनिधित्व सुनिश्चित जुइमाःगु, नेवा: राज्य पिनेया नेवा:त च्वनाच्वंगु लागाय् बाहुल्यताया लिधंसाय् स्वायत्त क्षेत्रया अधिकार सुनिश्चित नापं गैर नेवाः राज्य दुने नेवाःतय्त समानुपातिक प्रतिनिधित्व सुनिश्चित जुइमाः व थःगु अधिकार प्राप्तिया निंतिं सकल नेवाःत छधी छप्पँ ख: धकाः घोषणा याःगु दु ।
थीथी झिंनिगू पुचःलय् या:गु सहलह लिपाः थिमिया बालकुमारीइ छगू सभा यानाः प्यंगू बुँदे घोषणापत्र सार्वजनीक याःगु खः । सभाय् संघर्ष समितिया नायः नरेन्द्रभक्त हाडां प्यंगू बुँदे घोषणपत्र ब्वनाः न्यंकादीगु खः ।
निन्हुयंक न्ह्याःगु राजनीतिक सम्मेलनय् ६०गू जिल्लया ७०० स्वयां अप्व प्रतिनिधितय ब्वति दुगु खः ।
नेवाः राष्ट्रिय राजनीतिक सम्मेलनं घोषणा याःगु बोदे घोषणापत्र थुकथं दु -
बोडे घोषणापत्र
१. नेवाः स्वायत्तता, स्वशासन, आत्मनिर्णयया अधिकार व आदिवासी अग्राधिकार नापं नेवाः आदिभूमिइ नेवाःतय्गु थःगु हे राज्यया सुनिश्चितताया लिसेलिसें संघीय गणतन्त्रया संविधान इलय् हे च्वयाः जनताया संविधान सुनिश्चित यायेमाःगु खँय् सः थ्वयेकाच्वना ।
२. प्रस्तावित नेवाः राज्यया पिने च्वंपिं नेवाःतय्गु हकहित व अधिकारया नापं नेवाः राज्यय् समानुपातिक प्रतिनिधित्व सुनिश्चित जुइमाः । नापं वय्कःपिं च्वनाच्वंगु लागाय् बाहुल्यताया लिधंसाय् स्वायत्त क्षेत्रया अधिकार सुनिश्चित जुइमाः । थः च्वनाच्वंगु गैर नेवाः राज्य दुने नेवाःतय्त समानुपातिक प्रतिनिधित्व सुनिश्चित जुइमाः ।
३. संविधानसभाया राज्य पुनर्संरचना समितिं प्रस्तावित याःगु नेवाः प्रदेशया लागाया खँय् प्रादेशिक लागा तसकं मगाःमचाः जूगुलिं सम्भाब्यताया लिधंसाय् अझ तःकू व तब्या यायेमाःगु खँया सः थ्वयेकाच्वना ।
४. च्वय् न्ह्यथनागु अधिकार व राजनीतिक स्थितिया सुनिश्चितताया नितिं नेवाःत सकलें न्ह्यागु हे दल संघ संस्था व खलःपुचःया प्रतिनिधित्व यानाच्वंपिं न्ह्याथाय् च्वनाच्वंपिं जूसां थ्व 'घोषणा पौ'स न्ह्यथनातःगु व नेवाः राष्ट्रिय राजनीतिक सम्मेलनं क्वःछ्यूगु अवधारणा पौ कथंया अधिकार व थ्व सम्मेलनं क्वःछ्यूगु प्रस्तावतय् खँय् सकलें नेवाःत छधी छप्पँ खः धकाः घोषणा यानागु जुल ।
१४ कछलागा ११३१,
(४ डिसेम्बर २०१०) शनिवाः ।
बोडे थिमि ख्वप ।
(किपा : उदेन न्हूसाय्मि)
