नेवाः सम्मेलनया नितिं थनिंनिसें प्रचार र्याली
ख्वप (सन्ध्या टाइम्स)/नेवाः स्वायत्त राज्य मंकाः संघर्ष समितिं थ्वहे वइगु शुक्रवाः १७ गतेनिसें याइगु नेवाः राष्ट्रिय राजनीतिक सम्मेलनया प्रचार प्रसार यायेगु झ्वलय् थनिंनिसें हे ख्वपय् प्रचार र्याली पिकाःगु दु ।
नेवाः राष्ट्रिय राजनीतिक सम्मेलन उलेज्या व्यवस्थापन समितिया ग्वसालय् ख्वपया मिनीबस पार्कंनिसें माइकिङ यानाः पिकाःगु प्रचार र्याली अनया कमल विनायक लागाय् थ्यंकाः क्वचाःगु खः। थौं उगु व्यवस्थापन समितिया दुजःपिं नापं नेवाः आन्दोलनया कार्यकर्तात जानाः छेँखाप्वाः पतिकं पर्चा इनेगु ज्या यानाः अथे प्रचार र्याली याःगु खः। उलेज्या व्यवस्थापन समितिया कजि त्रिरत्न शाक्यं म्हिगः तक उलेज्याझ्वःया आन्तरिक तयारी यानागु नापं थनिंनिसें प्रचार र्याली शुरु यानागु जानकारी बियादिल। मंकाः संघर्ष समितिं १७ गते ख्वपय् सांस्कृतिक झाँकी नापं उलेज्या यायेगु अले उकुन्हु हे सनिलंनिसें मध्यपुर बोडेय् बन्द सत्र यानाः १८ गते हे छगू र्याली पिकयाः घोषणा सभा तकं यायेगु ग्वसाः ग्वयातःगु दु ।
