भ्रष्ट सचिवयात जनतां ज्वनेवं प्रहरी हस्तक्षेप
येँ (सन्ध्या टाइम्स)/येँया २२ वडा पुलांभन्सारय् च्वंगु आरबी कम्प्लेक्सं नियम विपरित छेँ दनेत स्वःगु खँयात कयाः स्थानीय जनता तम्वःगु दु। वंगु शुक्रवाः थ्वहे खँय् कचकच जुयाः स्थानीय जनतां उगु वडा ज्याकूया सचिव शिवराज सोतीयात ज्वनाः कुनेगु समेत ज्या याःगु खःसा सचिवयात 'अपहरण यात' धइगु त्वहचिनाः प्रहरीं न्याम्ह मनूयात ज्वना यंकेवं उकिया विरोधय् स्थानीय जनतां आरबी कम्प्लेक्स नापं खिचापुखू न्हूसतक लागा हे बन्द याना बिउगु खः ।
म्हीग प्रहरीं स्थानीय जनता चिनिकाजी महर्जन, विकास डंगोल, राधाकृष्ण महर्जन, बालकृष्ण महर्जन व गौतम डंगोलयात ज्वना यंकूगु खःसा म्हिगः मनपाय् खँल्हाबल्हा यानाः वय्कःपिंत म्हिगः त्वःतूगु दु। उमित ज्वंगुया विरोधय् म्हिगः नं खिचापूगु लागा बन्द जूगु खः ।
आरबी कम्प्लेक्सं नियम मिचे यानाः छेँ दनेत्यंगुलिं न्हापा रोके यानातःगु खःसा आः न्हूम्ह सचिव वयेवं ध्यबा नयाः नक्सा पास याके बिउगु खः। थ्वहे खँय् स्थानीय जनतां म्हीग वडा सचिवयात आरबी कम्प्लेक्सय् खँ ल्हाकेत हःगु खः। तर मनपां थः कर्मचारी अपहरण यात धकाः प्रहरी हस्तक्षेप याके बिउगु खः। आः वडा सचिव वडाय् मवयेधुंकूगु दुसा स्थानीय जनतां वं पास यानातःगु नक्सा खारेज याकेत माःगु दु ।
