नेपालभाषा स्यनेज्याकुथिया औपचारिक उलेज्या
येँ (सन्ध्या टाइम्स)/नेपालभाषा स्यनेज्याकुथिया थौं औपचारिक उलेज्या जुल। थुकिया नापं थनिंनिसें हे नेपालभाषा प्रशिक्षण कक्षा नं संचालन जुइगु जुल। नेपाल आदर्श माध्यामिक विद्यालयय् जूगु उगु ज्याझ्वःया उलेज्या ज्याकुथिया नायः डा. महेशमान श्रेष्ठं यानादीगु खः। देशय् संघीय लोकतान्त्रिक गणतन्त्र वयेधुंकूगु इलय् दक्व भाषाभाषीतय्त समान अधिकार दुगुलिं थःगु अधिकार प्रयोग व संरक्षण यायेगु निंतिं नेवाः भाय् मसःपिं नेवाः, गैर नेवाः व विदेशीतय्त प्रशिक्षण बीगु आज्जुं थुगु कक्षा संचालन याःगु खः ।
थनिंनिसें संचालन जूगु उगु प्रशिक्षणय् निगू बिस्कं कक्षा तःगु खः। थुकी खुगू हप्ताया प्रशिक्षक तालिमया कक्षा बिष्णु चित्रकारं कयादीगु दु। अथे हे प्रशिक्षण (भाषा) या कक्षा प्रेमहिरा तुलाधरं कयादीगु जूगु दु ।
उलेज्या ज्याझ्वलय् न्हूदँ समारोह समिति - ११३१ या नायः विपेन्द्र महर्जन, नेपालभाषा केन्द्रीय विभागया नायः प्रा. प्रेमशान्ति तुलाधर, नेवाः देय् दबूया नायः नरेश ताम्राकार व नेपाल आदर्श मा.वि.या प्रधानाध्यापक वरुणप्रसाद वैद्यंपिंसं भिंतुना बियादीगु खः ।
थुकी झापा, धरान, खोताङ, सिन्धुपाल्चोकंनिसें प्रशिक्षकपिं वःगु खः। थुगु कक्षा भाषा मसःपिंत भाषा स्यनेगुनापं मेपिंत भाषा स्यनीपिं प्रशिक्षक तयार यायेगु ल्याखं शुरु याःगु खः ।
