'गोप्य बैठकय् नेवाः नेता ग्व?'
येँ (सन्ध्या टाइम्स)/नेकपा (एमाले) या अध्यक्ष झलनाथ खनालं नेपाल संवत्यात व्यवहारिक छ्यलाबुलाय् हयेगु ज्याय् वयाच्वंगु पंगःत चीकेत सरकारं याकनं हे माःगु समिति गठन यानाः ज्या न्ह्याकि धकाः इनाप यानादीगु दु ।
न्हूदँ ११३१ क्यंगु लसताय् म्हिगः नेपाल लोकतान्त्रिक नेवाः संघ येँ १३ वडा कचाया ग्वसालय् जूगु भिंतुना तुच्चा ज्याझ्वलय् न्ववासें वय्कलं थ्व खँ धयादीगु खः। वय्कलं धयादिल, 'न्हूगु संविधान मवयेकं देय्या छुं नं भाषाभाषी, जातिया मुक्तिया म्हगस पूवनी मखु ।'
उगु हे ज्याझ्वलय् न्ववासें लोकतान्त्रिक नेवाः संघया केन्द्रीय नायः सानुराजा शाक्यं स्वंगू तःधंगु दलया विशिष्ट नेतातय् महत्वपूर्ण गोप्य बैठकय् छम्ह हे नेवाः नेता दुमथ्याःगु खँय् आपत्ति प्वंकादिल ।
ज्याझ्वलय् एमालेया उपाध्यक्ष वामदेव गौतम लिसें नेतात अमृत बोहरा, अष्टलक्ष्मी शाक्य, कृष्ण गोपाल श्रेष्ठ नापं आपालं कार्यकर्ता व भाषाह्यमितय् उपस्थिति दुगु खः ।
