हाकुबजाः विरुद्ध मोर्चाया अभियान
येँ (सन्ध्या टाइम्स)/मोहनि नखः जःखः न्ह्याबलें बजाःभाः न्ह्यःनेलाःथे थकायेगु, तस्करी यायेगु नापं बजारय् न्हिय न्हिथं माःगु सामान तकं सुचुकीगु ज्याया विरुद्ध माओवादी समर्थित नेवाः राष्ट्रिय मुक्ति मोर्चां अभियान न्ह्याकीगु जूगु दु ।
मोर्चाया येँ जिल्ला समितिपाखें थौं बालाजुइ च्वंगु नेपाल गुणस्तर नापतौल विभागया ज्याकुथी डेलिगेशन वनाः थ्व अभियान शुरु याःगु खः। मोर्चापाखें उगु विभागयात गुणस्तरहीन खाद्य सामान मीगु ज्या थ्वहे मोहनि व स्वन्ति नखः जुइगु ठहर यानाः उकिं जनताया स्वस्थ्य तप्यंक हे लिच्वः लाइगु, ब्यापारीतय्सं नापतौल मिले मयासे जनतायात ठगे यायेगु ज्या तकं जुइगु जुयाः उज्वःगु खँयात माःगु कथं अनुगमन यानाः जनतायात समस्या समाधानया निंतिं भूमिका म्हितेत माग यानाः ज्ञापन पत्र तकं लःल्हाःगु खः ।
उकिया नितिं माल धाःसा थःपिं नं नापं वयेत तयार दु धकाः नं मोर्चां धाःगु दु। अथे हे नेवाः मोर्चां कंस २१ गते जिल्ला प्रशासनया ज्याकुथी नं ज्ञापन पौ बिउ वनीगु जूगु दु ।
मोहनि व स्वन्ति नखःया इलय् हाकुबजाः, तस्करी व न्ह्यःनेलाःथे बजाः भाः थकाइगुया विरुद्ध जनतायात सचेत यानाः थः हे न्ह्यचिला वनेत इनाप यायेगु कथंया र्याली पिकायेगु, नापं सचेत यायेगु थीथी कथंया ज्याझ्वः नं यायेगु जुइ धकाः नेवाः राष्ट्रिय मुक्ति मोर्चा येँ जिल्ला समितिया नायः उमेश स्थापितं धयादीगु दु ।
